Bu seçkilərin keçirilməsini zəruri edən amillərdəndir - Elman Nəsirov

Bu gün Azərbaycana qarşıya qoyulan hədəflərə nail olunub və hazırda dövlətimizin qarşısında yeni hədəflər dayanıb. 

Ölkə.Az xəbər verir ki, bunu deputat Elman Nəsirov parlamentin bu gün keçirilən plenar iclasında deyib.

Onun sözlərinə görə, cənab Prezident qarşıya qoyduğunu bütün strateji hədəflərə nail olub və onları həll edib. “İndiyədək cənab Prezidentin yürütdüyü siyasətin ana strateji xətti Azərbaycanın ərazi bütövlüyünü təmin edib suverenliyi bərpa etmək idi və buna da nail olundu. Bu hədəflərə nail olunduğundan daha 2025-ci ilədək gözləməyə ehtiyac yoxdur. Qarşıda yeni hədəflər dayanıb və ona görə də fevralın 7-də növbədənkənar seçkilərin keçirilməsi tamamailə məqsədəuyğundur”, - o qeyd edib.

Deputat eyni zamamda  əlavə edib ki, növbəti ildə dünyanın bir çox ölkələrində, xüsusən də Rusiya və ABŞ-də keçiriləcək seçkilər dünyada  geosiyasi reallıqlar yaradır. “Bu da seçkilərin keçirilməsini zəruri edən amillərdəndir”, - o bildirib. 

Mürtəza
Ölkə.Az