Əlibəyli sakini əməliyyatdan çıxdı

Ötən gün Tovuzun Əlibəyli kəndində ermənilərin gülləsinə tuş gələn və Bakıya gətirilən mülki şəxs Fərid Məmmədov 1 saylı Kliniki Tibbi Mərkəzdə əməliyyat olunub. 

Ölkə.Az ans press-ə istinadən bildirir ki, bu barədə F.Məmmədovun həkimi Elnur Abdullayev məlumat verib. Həkim əməliyyatın yaxşı keçdiyini və F. Məmmədovun üzündəki gülləni çıxardıqlarını söyləyib: 

“Hazırda xəstə narkozdadır. Qanaxması yoxdur. Yaralarını tikmişik. Ayılandan sonra palataya köçürüləcək. Xəstənin vəziyyəti yaxşıdır”.

Qeyd edək ki, 17 yaşlı Fərid Məmmədov əməliyyat olunmaq üçün xüsusi ambulans helikopterlə Bakıya gətirilib. 

Ötən gün axşam saatlarında Tovuz rayonunun Əlibəyli kəndində intensiv atəşə tutulub. 

Ermənilərin aramsız açdıqları atəş nəticəsində 2 kənd sakini yaralanıb. Bunlar 1997-ci il təvəllüdlü Fərid Məmmədov Nəbi oğlu və 52 yaşlı Anya Ələsgərovadır. 

Güllə Fəridin burun nahiyyəsindən girərək çənəsində dayanıb.

Ölkə.Az