ABŞ-ın zərbə qrupu Ədən körfəzinə yerləşdirildi

Birləşmiş Ştatlar Yəmənin “Ənsar Allah” şiə qruplaşmasına məxsus husi üsyançılarına qarşı cavab tədbirləri variantlarını nəzərdən keçirir, çünki qrupun təkrar hücumları Qırmızı dəniz vasitəsilə beynəlxalq gəmiçiliyi pozur.

"Ölkə.az" xəbər verir ki, adı açıqlanmayan iki ABŞ rəsmisi "Politico"ya bildirib ki, husilərin hücumlarına potensial cavabını dəstəkləmək üçün "USS Dwight D. Eisenhower" təyyarədaşıyan gəmisinin başçılıq etdiyi zərbə qrupu Ədən körfəzinə yerləşdirilib.

Rəsmilərdən biri də nəşrə bildirib ki, Yəməndə yerləşən qruplaşmaya zərbə endirmək üçün ABŞ hərbi komandanlığına seçimlər verilib.

Politico xəbər verir ki, Pentaqonun sözçüsü şərh verməkdən imtina edib.

Qeyd edək ki, Yəmən husiləri İsrailə gedən gəmilərin keçidinə mane olacaqlarını bəyan ediblər.