Bu layihənin məktəblərin 15%-ni əhatə etməsi planlaşdırılır

Bu gün Azərbaycan Respublikası Elm və Təhsil Nazirliyinin dəstəyilə fəaliyyət göstərən "Peşə təmayüllü siniflərin təşkili” layihəsi dekabrın 18-də 2019-2023-cü tədris illərinin yekunlarına həsr olunan "İlkin bacarıqlardan davamlı inkişafa" adlı hesabat tədbiri keçirib.

Ölkə.Az xəbər verir ki, hesabat tədbirində çıxış edən təhsil nazirinin müavini Həsən Həsənli layihənin əhəmiyyətindən danışıb:

"2019-cu ildən və pandemiya dövründə başlamasını nəzərə alsaq, bu istiqamətdə görülmüş işlər xüsusilə təqdirəlayiqdir.
Biz bu gün sevinirik ki, 20 nəfərlə başlamış layihə 200-ə yaxın məktəblini əhatə edir.

Qarşıda duran kifayət qədər ambisiyalı hədəfimiz var. Cənab Prezidentin təsdiq etdiyi 2020-2026-cı illər üzrə sosial iqtisadi inkişaf strategiyasında bu rəqəmin məktəblərin 15%-ni əhatə etməsi planlaşdırılır. Düşünürük ki, bu hədəfə çatmağın ən uğurlu komponenti ilk növbətə məktəblərdə aparılan infrastrukturun yenilənməsi işləridir.

Cənab Prezidentin müvafiq qərarları və eyni zamanda Heydər Əliyev Fondu tərəfindən son 20 ildə 4000-ə yaxın məktəb təmir olunub və tikilib".

Billurə Yunus