Xəstə uşağa lağ etdilər: qınaqdan sonra hamısı ÜZR İSTƏDİ - VİDEO

Fiziki və əqli məhdudiyyətli uşağın sosial şəbəkələrdəki videosu müzakirələrə səbəb olub.

Ölkə.Az xəbər verir ki, İlfan adlı azyaşlının müalicə xərclərinin qarşılanması üçün tiktokda yarışma təşkil edilib.

Sözügedən platformada onunla qarşılaşan məktəblilər qarşı tərəfə xoşagəlməz davranış sərgiləyiblər. 

Belə ki, yarışma zamanı xəstə uşağın qohumu rəqib hesab olunan yeniyetmələrdən onun qalibiyyətinin əlindən almamasını xahiş edib. Məktəblilər isə qadının sözlərinə məhəl qoymayıb. 

“Oyun oyundur, Allah şəfasını versin. Gücümüz çatan dəstəyi göstərməyə hazırıq, dəxli yoxdur. Allah haqqı, salamı kəsərəm, belə hərəkət eləmə” - deyə o söyləyib. 
Yeniyetmələr daha sonra xəstə uşağı yamsılayıblar və “məni belə çək, de ki, burada da xəstə var” kimi sözlər söyləyiblər. Onların İlfan adlı digər uşağa qarşı hərəkəti kəskin tənqid edilib.

Daha sonra videoda fiziki məhdudiyyətli uşağı lağa qoyan yeniyetmələrdən ikisi üzr istəyib. Onlardan biri deyib:

“Buradan İlfandan da üzr istəyirəm. Görürsənsə, bağışla, üzrlü say, bir səhvdir etmişik. Həmçinin anasından və nənəsindən də üzr istəyirik. Yəqin ki, bizi başa düşərsiniz. Digər uşaqlar da video çəkib atacaqlar”.

“İlfanın özündən də, ailə üzvlərindən də dönə-dönə üzr istəyirik. İstəməzdik belə olsun. Zarafat demişik, nə isə etmişik, hamının yerinə üzr istəyirik”- digər yeniyetmə bildirib.

Qeyd edək ki, İlfanın qohumları onun gözünün protezinin dəyişməli olduğunu bildiriblər. Həmçinin nənəsi yeniyetmənin yeriyə bilmədiyini də deyib.

Billurə Yunus