Prezident sübut etdi ki, bir zərbə ilə onları darmadağın etməyə qadirdir - Fazil Mustafa 

“24 dekabr Prezident İlham Əliyevin doğum günüdür. Amma cənab Prezident Azərbaycana  20 sentyabrda yeni doğum günü hədiyyə edib”.

Ölkə.Az xəbər verir ki, bunu deputat Fazil Mustafa parlamentdə çıxışı zamanı qeyd edib. 

Əlavə edib ki, Prezident bunu Xankəndidə keçirilən futbol matçında da bir daha sübut etdi: “Prezident sübut etdi ki,  futbol meydanında Avropa, ABŞ və digər ölkələr tərəfindən topa doldurulan ab-havanı bir zərbə ilə darma-dağın  etməyə qadirdir. Bu, bir daha göstərdi ki, Azərbaycanın taleyi nə Vaşinqtonda, nə Brüsseldə, nə də Moskvada həll olunur. Azərbaycanda həll olunur. Futbol meydanında həll olunur. 
İndi növbəti hədəf Naxçıvana yolun açılmasıdır. Ermənistan cəmiyyəti demək olar buna hazırdır”.

Deputatın sözlərinə görə, bu gün ermənilər də başa düşür ki, onlara kimsə dəstək verməyəcək. “Ermənilərin havadarları olan Avropa, ABŞ-nin verdiyi dəstək sözdən başqa bir şey deyil. Bir daha qeyd edirəm ki, Prezidentin qətiyyəti ilə Naxçıvana da yol açılacaq və bu iş uğurla başa çatacaq”, - o qeyd edib.

Mürtəza
Ölkə.Az