Bulvarda batan gəmidən xilas edilənlərdən üçü xəstəxanaya yerləşdirilib - RƏSMİ/YENİLƏNİB

Bu gün səhər saatlarında Xəzər dənizində baş verən hadisə nəticəsində xəsarət almış şəxslər (3 nəfər qadın olmaqla) Kliniki Tibbi Mərkəzə (KTM) hospitalizasiya olunub. 

Bununla bağlı KTM məlumat yayıb.

Bildirilib ki, Mərkəzdə onlara zəruri tibbi xidmət göstərilib:

“Hazırda vəziyyətləri stabildir. Gün ərzində ambulator müalicə üçün evə buraxılmaları nəzərdə tutulub”.

***
Bulvarda tur gəmisindən xilas edilənlərdən üçü xəstəxanaya yerləşdirilib.

TƏBİB-dən İqtisadiyyat.az-ın sorğusuna cavab olaraq bildirilib ki, bu gün saat 11:16 radələrində "Dəniz Mall"ın yaxınlığında qayıq aşması ilə bağlı Respublika Təcili və Təxirəsalınmaz Tibbi Yardım Mərkəzinə çağırış daxil olub.

"Dərhal hadisə yerinə 2 təcili tibbi yardım briqadası göndərilib. Hadisə nəticəsində 4 nəfər (cinsi qadın) zərər çəkib. 1 nəfərə yerində ilk tibbi yardım olunub. 3 nəfər isə hipotermiya diaqnozu ilə Kliniki Tibbi Mərkəzə təxliyə olunub. Onlara zəruri tibbi xidmətlər göstərilib", - məlumatda vurğulanıb.

Qeyd edək ki, bu gün Dənizkənarı Bulvar ərazisində dənizdə gəzinti qayığı çevrilib. FHN-in Kiçikhəcmli Gəmilərə Nəzarət və Sularda Xilasetmə Dövlət Xidmətinin dalğıc-axtarış qrupu hadisə yerinə cəlb edilib. Əməliyyat şəraiti qiymətləndirilərkən, gəzinti qayığının alt hissəsinin zədələnməsi və gövdəsinə su dolması nəticəsində 3-ü ekipaj üzvü, 3-ü sərnişin olmaqla 6 vətəndaşın təhlükəli vəziyyətdə qalması məlum olub. FHN Kiçikhəcmli Gəmilərə Nəzarət və Sularda Xilasetmə Dövlət Xidmətinin dalğıc-axtarış qrupunun Daxili İşlər Nazirliyi Su Nəqliyyatında Polis İdarəsinin əməkdaşları ilə birgə həyata keçirdikləri xilasetmə əməliyyatı nəticəsində vətəndaşlar xilas ediliblər.