İlahiyyatçı: “İnsan orqanını maddiyyat üçün heç kəsə sata bilməz”

“İslam dinində insanın öz orqanını və ya başqasının orqanını satması günah sayılır. İnsan orqanları ilə alver olmaz. Yalnız öz sağlamlığına zərər vurmamaq şərti ilə müəyyən orqanının bir hissəsini başqasına verə bilər. Bəzən qara ciyər, böyrək köçürməsi zamanı belə hallar olur. Lakin dövrümüzdə bəzi şəxslər öz orqanlarını satışa çıxarırlar. Ola bilsin, sosial problemlərinin son həddinə gəlib çıxırlar, başqa yolları qalmır. Buna  baxmayaraq, insan Allahın verdiyi orqanı maddiyyat üçün heç kəsə sata bilməz”.

Bu sözləri Pravda.az-a açıqlamasında ilahiyyatçı Tural İrfan deyib.

İlahiyyatçının sözlərinə görə, bu məsələdə vəfat etmiş insan istisnadır: “Ölən adamın sağlığında yazdığı vəsiyyəti əsasında, ya da öləndən sonra varisinin icazəsi əsasında orqanlarını başqasına vermək olar. Ancaq diri adamın öz orqanını satması doğru deyil. Bağışlaması da özünə ziyan vurmayacaq həddə öz yaxınlarına, müsəlmanlara caizdir. Fəqət bunlara rəğmən, məcburiyyət qarşısında qalan, dözülməz problemləri olan şəxslər istisnadır. Bəzən olur ki, bir adama böyrək axtarılır, hansısa kasıb adamın da böyrəyi ona uyğun gəlir. Qarşılıqlı razılaşma ilə böyrəyi köçürürlər. Ancaq bu hallar mütləq qanun çərçivəsində, qanuni yollarla olmalı, orqan alveri formasına keçməməlidir”.