Əsəd: \"Rusiya Yaxın Şərqi terrorizmdən xilas edəcək\"

Əsəd ABŞ-ı ittiham edib

Ölkə.Az "USA Today"a istinadən xəbər verir ki, Suriya prezidenti Bəşər Əsəd Rusiya hava qüvvələrinin Suriya ərazisində zərbələr endirməsini dəstəkləyib.

O, bunu Yaxın Şərqi terrorizmdən xilas etməyin yeganə üsulu adlandırıb. Əsəd bəyan edib ki, ABŞ-ın rəhbərlik etdiyi koalisiya Suriyada qeyri-stabilliyin səbəblərindən biridir. Prezidentin fikrincə, Qərb ölkələri Avropanın İkinci Dünya Müharibəsindən bəri görmədiyi böyük böhrana səbəb olacaq suriyalıların kütləvi köçməsinə şərait yaradır.

O hesab edir ki, Rusiyanın hərbi kampaniyası Suriyada uğur qazanacaq, çünki İran da daxil olmaqla, beynəlxalq dəstəyə malikdir.

"Kampaniya uğurlu olmalıdır. Əks halda biz bütün regionun dağılması ilə üzləşəcəyik", - deyə Əsəd əlavə edib.

Sonda Bəşər Əsəd Rusiyanın müdaxiləsinin ölkə ordusu ilə razılaşdırıldığını təsdiq edib.

Rəşid Mustafazadə

Ölkə.Az