Kurtlar Vadisi - 33

33 saylı seçki dairəsi, 4 məşhur namizəd, 1 mandat

Parlament seçkilərinə az bir zaman qalıb. Artıq kimin hansı dairədən namizədliyini irəli süməsi məlumdur. Hər dairədə bir-birindən güclü rəqiblər var. Bəzi dairələr var ki, orada kimin deputat olacağı ilk gündən məlum olur. Ancaq 33 saylı Xətai seçki dairəsindəki rəqiblərə baxanda elə bil Çempionlar Liqasının ölüm qrupunu görürük. 33 saylı Xətai seçki dairəsindəki rəqiblərin dördü də bir-birindən güclüdür: Hüseynbala Mirələmov, Üzeyir Cəfərov, Ruslan İzzətli, Arif Hacılı.

YAP-ın Xətai rayon təşkilatının sədri, tanınmış hərbi ekspert, D18 hərəkatının sədri və Müsavat partiyasının başqanı.

Hüseynbala Mirələmov: yazıçı, ssenarist, millət vəkili, Azərbaycan Dövlət Neft Akademiyasında kafedra müdiri, texnika elmləri doktoru, professor, Azərbaycan Mühəndislər Akademiyasının müxbir üzvü, Rusiya Mədən Akademiyasının, Azərbaycan Yazıçılar Birliyinin və Azərbaycan Jurnalistlər Birliyinin üzvü, çoxsaylı elmi və bədii əsərlərin müəllifi, "Qızıl qələm", "Qızıl dərviş", "Qızıl buta", "Abdulla Şaiq" və "Rəsul Rza" mükafatları laureatı, Fransa Sənayeçilər Assosiasiyasının "Napoleon" qızıl medalının sahibi. MDB ölkələri üzrə 8 dəfə "İlin direktoru" adına layiq görülüb və YAP-ın Xətai rayon təşkilatının sədridir. Ötən seçkilərdə deputat seçilən Hüseynbala Mirələmov bu dəfə də iddialıdır. Hüseynbala Mirələmovun bəlkə ağlına belə gəlməzdi ki, bu dairədən, bu qədər güclü rəqiblərlə qarşılaşacaq.

Hüseynbala Mirələmovun hal-hazırda deputat olması, hakim partiyanın Xətai rayon təşkilatının sədri olması ilə digər namizədlərdən bir addım öndə görünür. Ancaq dairədəki digər namizədlərin güclü olması, deputatın əl-qolunu bağlayır.

Ruslan İzzətli: Ruslan İzzətli çox gənc yaşlarından ictima-siyasi fəaliyyətə başlayıb. 2009-cu ilin yanvarında Bütöv Azərbaycan Gənclər Təşkilatı yaradılması ideyasını irəli sürüb və 24 fevral 2009-cu ildə Bütöv Azərbaycan Gənclər Təşkilatını (BAGT) qurub. BAGT-nin I (Təsis) Qurultayında təşkilatın ilk sədri seçilib. Ruslan İzzətli hal-hazırda D18 hərəkatının sədridir.

Ruslan İzzətli digər namizədlərdən fərqli olaraq gənc olması və dinamikliyi ilə seçilir. O, daha çox gənclərin dəstəyini alaraq deputat mandatı qazanmaq arzusundadır.

Üzeyir Cəfərov: Azərbaycan mediasında ən çox açıqlama verən şəxslərdən biridir. Daim mediaya yaxın olduğu üçün jurnalistlərin sevimlilərindəndir. Üzeyir Cəfərov da digər namizədlər kimi deputatlığa iddialıdır. Onunla söhbət zamanı bildirdi ki, Qarabağ uğrunda gedən döyüşlərin iştirakçısıdır. Bu da onu digər namizədlərdən fərqləndirir.

Arif Hacılı: Xalq Hərəkatına tələbə ikən, 1988-ci ildə Bakıda keçirilən noyabr mitinqləri zamanı qoşulub. 1989-cu ildə Zaqatalada AXC-nin yerli təşkilatının yaradıcılarından biri və lideri olub. 1989-cu ilin sentyabr ayında AXC Ali Məclisinin üzvü seçilib. 1989-cu ilin sonu, 1990-cı ilin əvvəllərində AXC-nin parçalanmasının qarşısının alınması, 20 yanvar hadisələrindən sonra isə bu təşkilatın toparlanması üçün xüsusi fəallıq göstərən Ali Məclis üzvlərindən biri olub. 1990-cı ildə 204 saylı Zaqatala seçki dairəsindən Azəbaycan Xalq deputatı seçilib. 1991-ci ildə yaranan Azərbaycan Ali Soveti Milli Şurasının və Milli Məclisin üzvü olub. 1992-ci İldə Müsavat Partiyasının Bərpa Mərkəzi yarandığı gündən Müsavat partiyasının Bərpa Mərkəzinin üzvü, 1994-cü ildən Müsavat partiyasının Seçki, Təşkilat məsələləri katibi, sonralar başqan müavini, 2006-cı ildən Müsavat Partiyası Mərkəzi İcra Aparatının rəhbəri olub. 2014-cü ildə Müsavat partiyasında alternativ qaydada keçirilən başqan seçkilərində qalib gəlib. Hazırda Müsavat Partiyasının başqanıdır.

Arif Hacılı haqqında çox danışmağa ehtiyac yoxdur. Müsavat başqanı Azərbaycan siyasətində kifayət qədər tanınan şəxslərdəndir. Arif Hacılının 33 saylı Xətai seçki dairəsindən namizədliyini verməsi həm o dairəyə marağı artırır və rəqiblərin güclü olması isə dairəni daim diqqət mərkəzində saxlayır.

Kimin seçilməsindən asılı olmayaraq seçkidən sonra bu dairə haqqında söz-söhbətlərin çıxacağı indidən məlumdur.

Yazıq seçici, necə qərar versin ki, nə şiş yansın, nə də kabab...

Səxavət Məmməd
Ölkə.Az