Tehranın ermənilərlə Təbriz planı

İranın xarici işlər naziri Hüseyn Əmir Abdullahianın dekabrın 27-də İrəvana reallaşan səfərinin heç də bölgə ölkələri arasında mehriban qonşuluq münasibətlərinin qurulmasına xidmət etmədiyi ortaya çıxdı.

İranlı nazir İrəvan görüşləri barədə açıqlamasında bildirib ki, görüşlərdə ikitərəfli əlaqələr, “3+3” formatında regional əməkdaşlıq münasibətlərini, Qafqazda sülhün, sabitliyin, inkişafın region ölkələri və qonşularının iştirakı ilə mümkünlüyü müzakirə edilib.

Lakin İrəvan səfərində heç də region ölkələri arasında qarşılıqlı və faydalı əməkdaşlığa xidmət etməyən məsələlər barədə də tərəflər arasında razılıq olub. Bunlardan biri Tehranın İrəvana Təbrizdə konsulluq açmasına razılıq verməsi və bunun çox yaxın zamanda reallaşması ilə bağlı olub.

İranın xarici işlər naziri Hüseyn Əmir Abdullahian dekabrın 27-də İrəvanda erməni həmkarı Ararat Mirzoyanla keçirdiyi mətbuat konfransında Tehranın İrəvana Təbrizdə baş konsulluq açılmasına razılıq verdiyini bəyan edib.

İranın Qafan şəhərində baş konsulluğunun açıldığını vurğulayan iranlı diplomat deyib: “Yeni ilin ilk həftələrində mən və həmkarım Təbrizdəki baş konsulluğun rəsmi açılış mərasimində olacağımıza ümid edirik”.

İrəvanın azərbaycanlıların məskunlaşdığı Təbriz şəhərində baş konsulluq açması, heç də region ölkələrinin mehriban şəraitdə qarşılıqlı etimada əsaslanan əməkdaşlığa xidmət etmir, əksinə, bu əməkdaşlıq formatına ciddi xələlə gətirir və bunu kölgə altına salır. Tehran bölgədə sülhün, sabitliyin və sıx əməkdaşlığın yaranması barədə bəyanatlar versə də, atdığı real addımlar isə bunun əksini sübut edir. Tehranın İrəvana Təbrizdə baş konsulluğunun yaxın zamanlarda açılması barədə verdiyi bu rəsmi açıqlama İranın bölgədə dayanıqlı sabitliyin olmamasında və məkrli planlarını həyata keçirmək niyyətində olduğunu ortaya qoyur. Çünki bağlı qapılar araxasında hansı məsələlər müzakirə edilib onun barəsində geniş bilgiyə malik deyilik. Yəqin ki, bağlı qapılar arxasında Bakı və Ankaraya qarşı hansısa məsələlərin müzakirə edilib birgə fəaliyyət göstərilməsi barədə razılıqların əldə edilməsi də istisna deyil.

Biz hələ iranlı nazirin İrəvanda çəkdirdiyi məhrəm görüşlərdən fotoları paylaşmasını və bununla hansı mesajları verdiklərini demirik. Bu mesajlar çox şeyi deyir…

Mürtəza
Ölkə.Az