“Qadınlar bir-birinə paxıllıq edir, ayağından çəkir...” - Qalmaqallı açıqlama

“Hamımızın bildiyi kimi, qadın ən zərif varlıq hesab olunur və bir çoxları isə qadının zərif olduğu qədər həmçinin qeyri-müəyyən varlıq olduğunu düşünür. Təbii ki, bu fikrə səbəb qadınların müəyyən situasiyalar qarşısında verdiyi anlaşılmaz reaksiyalardır”. 

Bu sözləri psixoloq Gövhər Məmmədova “Yeni Sabah”a açıqlamasında bildirib. Onun sözlərinə görə, bu reaksiyalardan ən geniş yayılmışı paxıllıqdır: 

“Əfsuslar olsun ki, qadınlar həmcinslərini anlamağa çalışıb dəstək olmaq əvəzinə paxıllıq edərək ayağından aşağı çəkirlər. Mən deyərdim ki, burada ən əsas ünsür özgüvən əksikliyi və komplekslərdir. Elə bu səbəbdən çox zaman söhbət əsnasında 1 qadın digərinə öz ailəsi, işi haqqında şişirdilmiş fikirlər söyləyir, qarşı tərəf isə onları özündə tapmır və fərqində olmadan zamanla həmin qadının həyatını qısqanmağa, ona paxıllıq etməyə başlayır. Əslində, burada hər iki tərəfdədə kompleks nəzərə çarpır, 1-ci tərəf arzuladığı həyatı özününküləşdirib danışır, digər tərəf sadəcə qulaq asır, heyflənir, üzülür, paxıllıq edir. Pas dəmiri yediyi kimi paxıllıq da insanın içini yeyir və həmin şəxs artıq öz həyatını yaşaya bilmir, daima digərinin həyatına köklənir və bəzən bu qorxunc hadisələrə də gətirib çıxarır”. 

Psixoloq qadınlara belə bir tövsiyə verib:

“Güclü xarakter sahibi olaraq, komplekslərdən, yetərsizlik duyğusundan azad olaraq öz həyatınızı daha gözəl şəkildə yaşaya bilərsiniz. Rəfiqənizin həyatında hər hansı bir hadisə sizin həyatınızda baş vermirsə bu sizin həyatınızın daha pis olduğu anlamına gəlmir, nəticə etibarilə hər kəs eyni həyatı yaşaya bilməz, axı hər bir insan ayrı bir fərddir, öz düşüncələri, hədəfləri, istəkləri vardır. Fikrinizi özünüzə, həyatınıza kökləyərək öz planlarınızı qurun və bu qurduğunuz həyat sizin öz həyatınızdır, sizin üçün ən gözəl olanıdır”.