Azərbaycanda səma çahrayı rəngə boyandı - ELMİ İZAH

Bu gün səhər saatlarında ölkə ərazisində səmanın çəhrayı rəngə boyanması maraq doğurub.

Ölkə.Az xəbər verir ki, mənzərəni "əsrarəngiz", "füsünkar" adlandıranlarla yanaşı, vəziyyətdən narahat olan insanlar da olub.

Əslində isə səmanın bu cür çəhrayı rəngə boyanması qorxulu məqam yoxdur.

Belə ki, Günəş istilik və işıqla yanaşı zərərli şüalar və radiasiya da yayır. Yer kürəsində insanlar bu şüa və radiasiyalara məruz qalmır, çünki atmosferin qatları və yer kürəsinin maqnit sahəsi insanlığı günəşin dağıdıcı təsirlərindən qoruyur.

Günəşdə tez-tez  baş verən partlayışlar zamanı adına "koronal kütlə" dediyimiz hissəciklər kosmosa sovrulur. 

Günəş partlamasının bir başqa adı da elə "koronal kütlə boşalması"dır ki, bu da Günəşdəki maqnit sahələrindəki qarışıqlıqlar səbəbindən meydana gəlir və nəticədə böyük plazma kütlələri kosmosa atılır. 
Koronal kütlə boşalması günəş küləklərinin yaranmasına və kosmosda yüksək sürətlə hərəkət edə bilən hissəciklərin əmələ gəlməsinə səbəb olur. 

Sərbəst elektron və proton olan bu hissəciklər Günəşin fırlanması ilə Günəş küləkləri tərəfindən yer kürəsinə doğru sürətlə hərəkət edir.

Axının böyük hissəsinin qarşısı yer kürəsinin maqnit sahəsi tərəfindən alınmasına baxmayaraq, bir hissəsi  yerin atmosferinə daxil olur və atmosferdəki qaz molekulları ilə toqquşur.
Nəticədə də səma çəhrayı rəngə boyanır.