Perinatal Mərkəzdən köçürülən uşaqlardan 3-nün vəziyyəti ağırdır - RƏSMİ/FOTO

Ötən gecə Respublika Perinatal Mərkəzində baş vermiş yanğın zamanı xəstəxanadakı körpələrdən 15-i Kliniki Tibbi Mərkəzə aparılıb.

Xəstəxananın həkim neonatoloqu Şəhla Abdullayeva Ölkə.Az-a açıqlamasında uşaqlardan 3-nün vəziyyətinin ağır olduğunu söyləyib:

"KTM-ə Perinatal Mərkəzdən 15 yenidoğulmuş körpə gətirilib. Onlar xəstəxanamıza saat 5:15-dən etibarən gətirilməyə başlanıb. Uşaqlar 27 dekabrdan 8 yanavaradək doğulanlardır. Onların 8-i Reanimasiya şöbəsinə yerləşdirilib və müalicəyə başlanılıb. Ağırlıq durumu onlardan çoxunun erkən doğuşla dünyaya gəlməsi ilə əlaqədardır.  Körpələrdən 6-na tənəffüs dəstəyi göstərilir -  süni ventilyasiya cihazlarına qoşulub. Onlardan 3-ü invaziv rejimdədir, vəziyyətləri ağır-stabldir. Onların sağalması üçün əlimizdən gələni edirik".

Qeyd edək ki, təxliyyə edilən körpələrdən 11-i isə  Ə.Qarayev adına 2 saylı Klinik Uşaq Xəstəxanasına aparılıb.

Billurə Yunus