Prezident Göyçaydadır

Azərbaycan Prezidenti İlham Əliyev Ucara səfərini başa çatdıraraq Göyçay rayonuna gəlib.

Dövlət başçısı əvvəlcə Göyçay şəhərinin mərkəzində Heydər Əliyevin abidəsi önünə gül dəstəsi qoyub.

Göyçay Rayon İcra Hakimiyyətinin başçısı Mübariz Ağayev rayonda görülən işlər barədə Prezident İlham Əliyevə məlumat verib.

***

İlham Əliyev Göyçayda Gənclər Mərkəzinin açılışında iştirak edib. Dövlət başçısı Gənclər Mərkəzinin rəmzi açılışını bildirən lenti kəsib, burada yaradılan şəraitlə tanış olub.

Göyçay Gənclər Mərkəzinin tikintialtı sahəsi 3400 kvadratmetr olan ikimərtəbəli binada gənclər üçün hərtərəfli şərait yaradılıb. Prezident görülən işlərdən razılığını bildirib, tapşırıq və tövsiyələrini verib.

***

İlham Əliyev yenidən qurulan Göyçay-Ucar avtomobil yolunun açılışında iştirak edib.

“Azəryolservis” ASC-nin sədr əvəzi Saleh Məmmədov dövlət başçısına Göyçay-Ucar avtomobil yolunun yenidən qurulması layihəsi çərçivəsində görülən işlər barədə məlumat verib.

Dövlət başçısı rəmzi açılışını bildirən lenti kəsib.

3-cü texniki dərəcəli bu yolun uzunluğu 20 kilometrə yaxındır. Eni 12 metr olan yolda iki hərəkət zolağı var. Yol üzərində müxtəlif qovşaqlar, həmçinin bir dəmiryol körpüsü yerləşir. Bu yol Göyçay-Ucar istiqamətində avtomobillərin rahat hərəkətini təmin etməklə yanaşı, bölgədə gedən iqtisadi inkişaf proseslərinə də öz təsirini göstərəcək.

Ölkə.Az