Bu universitetlər köçürülə bilər - AÇIQLAMA

Bakı şəhərinin 2040-cı ilədək inkişafına dair Baş planında qeyd olunan vacib məqamlardan biri də bir neçə universitetin ixtisaslaşmış vahid bir şəhərcikdə yerləşdirilməsi, yaxud mövcud universitetlərdən birinin tamamilə yeni bir yerə köçürülməsi ilə bağlı qeyddir.

Əmlak sahəsi üzrə ekspert Elnur Azadov “Ölkə.Az”a açıqlamasında bildirdi ki, iri təhsil müəssisələrinin şəhərdən çıxarılması mühüm məsələdir:

“Böyük universitetlərin şəhər mərkəzlərində yerləşməsi əhalinin gediş-gəlişinə mənfi təsir göstərir. Göründüyü kimi, şəhər daxilində tıxaclar adətən səhər saatlarında olur. Tələbələrin də eyni saatlarda işə gedən şəxslərlə yola çıxmaları tıxacların yaranmasına səbəb olur. Buna görə də, iri təhsil müəssisələrinin şəhərdən çıxarılması mühüm məsələdir”. 

Ekspert deyir ki, tələbələrin 30%-i şəhərdə məskunlaşan şəxslər olduğu təqdirdə qalan hissə şəhərkənarında olanlar, regionlardan Bakıya üz tutanlardır: “Şəhər mərkəzində kirayə qiymətlərinin yüksək olduğunu nəzərə alsaq, tələbələrin bundan əziyyət çəkdiyini də deyə bilərik. Buna görə də, iri universitetlərin şəhər kənarına çıxarılması və universitet şəhərciyinin yaradılması, təyinatı uyğun olan bir neçə universitetin birləşməsi daha uyğun olar. Universitet şəhərciyində onlara xidmət göstərən yataqxanalar, tibb müəssisəsi, kitabxana və digər infrastruktur təşkil oluna bilər”. 

E. Azadovun sözlərinə görə, köçürüləcək universitetlər praktik məşğələlər az, tələbə sayı çox olan universitetlər olmalıdır: “Məsələn, bu kateqoriyaya Tibb Universitetini daxil edə bilmərik. Lakin Azərbaycan Dövlət Neft və Sənaye Universiteti, Azərbaycan Memarlıq və İnşaat Universiteti, Azərbaycan Dillər Universiteti və Azərbaycan Dövlət Pedaqoji Universiteti köçürürlməyə uyğundur”, - deyə ekspert əlavə edib.

Könül
Ölkə.Az