70 yaşı tamam olan Baba Vəziroğlu: Ən gözəl hədiyyəni mənə prezident vermişdi

Bu gün nasir, şair, tərcüməçi, kinodramaturq, Əməkdar incəsənət xadimi Baba Vəziroğlunun 70 yaşı tamam olur.

Ölkə.Az 70 illik yubileyində B.Vəziroğlu ilə söhbətləşib. O, saytımıza açıqlamasında yeni yaşında yalnız əbədi şeylər arzuladığını deyib: "Mən ürəyimdəkiləri təkcə doğum günümdə yox, ilin 365 günündə arzulayıram. Normal insanın arzusu nə olacaq ki?! Sülh, əmin-amanlıq olsun, tanrı bizi bəd nəzərdən, yaman gözdən qorusun, çox çətinə salmasın, bizi sınamasın, elə yüngül problemlərlə ötüşək. 

Xoşbəxt dünyada məmləkət olmur, xoşbəxt vətəndaşların toplumu "xoşbəxt məmləkət" adlanır. Ona görə də hər kəsə ürəyindəki arzulara çatmağı arzulayıram". 

Şair bildirib ki, ona bu vaxta qədər edilən ən gözəl hədiyyəni Prezident İlham Əliyev verib: "Ən gözəl hədiyyəni mənə cənab Ali Baş Komandan 70 yaşıma bir az qalmış etmişdi. Vallah, bu gündən sonra heç bir hədiyyə istəmirəm. Ümumiyyətlə, mənim dünya malında gözüm yoxdur. 

Mənim məşhur bir şeirim var, arzularımı orada demişəm:

Heç nə istəmirəm səndən, a dünya,
Hər səhər Günəşi qaytar Xəzərə.
Məni ona-buna möhtac eyləmə,
İmkan ver, yaşayım mən bircə kərə...

Bundan gözəl nə arzulayım?! Fani heç nə istəmirəm, əbədi şeylərdə gözüm var".

B.Vəziroğlu heç vaxt təmtəraqla doğum günü qeyd etmədiyini söyləyib: "Çünki mən şan-şöhrət, reklam sevən adam deyiləm. Boğazdan yuxarı postlar, rütbə sevən adam deyiləm. Evdə oluram və heç kimə heç nə demirəm. Kim bilirsə, istəyirsə gəlir". 

Qeyd edək ki, Prezident İlham Əliyev 2020-ci ilin 10 yanvarında B.Vəziroğlunu “Şöhrət” ordeni ilə təltif edib.

Billurə Yunus