Ət işbazlara görə bahalaşmır - Ekspert səbəbləri açıqladı

"Ölkə.Az" xəbər verir ki, bunu iqtisadçı ekspert Natiq Cəfərli deyib. O bildirib ki, ötən ilin ilk 10 ayında 2022-ci il ilə müqayisədə diri qoyun idxalı kəskin artıb:

"2022-ci ildə ölkəmizə 194 min 562 baş diri qoyun idxal olunub, bunun 90,4%-i Gürcüstandan ölkəmizə gətirilib. 2023-cü ilin ilk 10 ayında isə artıq məmləkətə 312 min 933 baş diri qoyun idxal olunub, yəni 10 aya 2022-ci ildən az qala 2 dəfə çox idxal olub. Bunun da 214 min 191 başı Gürcüstandan gətirilib". 

Ekspert deyir ki, Gürcüstanda bu işlə məşğul olanlar, əsasən, soydaşlarımızdır: "Gürcüstan türkləri tək bizə yox, Türkiyəyə də böyük həcmdə ət ixrac edirlər. Yaxşı, eyni candan-qandan olan soydaşlarımız nədən Gürcüstanda ciddi uğur qazanıb qoyunçuluğu, maldarlığı inkişaf etdirə bilirlər, Azərbaycanda isə yox?" 

N. Cəfərlinin sözlərinə görə, buna səbəb mikro və kiçik sahibkarlara edilən güzəştlərdir: "Gürcüstanda kiçik-mikro sahibkarlar 1% vergi verir, bizdə 20% tələb edirlər. Gürcüstanda aqrar sektorla tək hökumət deyil, seçilmiş yerli özünüidarə institutları, bələdiyyələr, mer institutları məşğul olur. Gürcüstanda aqrar sektora, bölgələrdə fermerlərə verilən kredit faizləri Tiflisdən 30-40% aşağıdır, bəzi proqramlara görə faizsizdir, bizdə isə regionlarda kredit faizləri Bakıdan 2 dəfə artıqdır". 

Ekspert belə olan halda ətin bahalaşmasının işbazlarla əlaqəli olmadığını qeyd edib.

Könül
Ölkə.Az