Politoloq: "Bədbəxt müsəlmanlar öz ölkələrini böyük dövlətlərin cıdır meydanına çeviriblər"

Rusiyanın Suriyadakı əməliyatları davam edir.

Bu əməliyatlardan ilhamlanan İraqın baş naziri bildirib ki, Rusiya ordusunu öz ölkələrində də görmək istəyir və Rusiya qoşunlarının İŞİD-lə mübarizə məqsədi ilə ölkəsinə daxil olmasına çox sevinəcək.

Yaxın Şərqdə baş verən son hadisələri politoloq Zərdüşt Əlizadə Ökə.Az-a şərh edib:

"İraqın baş naziri Heydər Əl-Abadi təklif edir ki, Rusiya kosmik hava qüvvələri Suriyada İŞİD-ə təsirli zərbələr endirdikdən sonra eyni işi İraqda da görsünlər. O, bildirir ki, onun höküməti Rusiyanı İraqa dəvət etmıyə hazırdır. İraqın 40%-i İŞİD-in işğalı altındadır. İŞİD iri şəhərləri, hərbi bazaları, neft terminallarını, mədənləri tutub. İŞİD hal-hazırda dünyaya neft satır. Bu İraq dövlətinin bütövlüyü üçün böyük təhlükədir. İndiyə qədər İraqa təlimatlarla, silahla, havadan zərbələrlə ABŞ kömək ediridi, ancaq bunun o qədər də görünən təsiri yoxdur. İraq istəyir ki, ABŞ və müttəfiqləri ilə yanaşı Rusiya da İraq ərazsində İŞİD-ə zərbələr endirsin. İraqın baş naziri Heydər Əl-Abadinin fikrincə İran, İraq, Suriya və Rusiya İŞİD-ə qarşı ittifaq yaratmalıdır.

Bu fikrə ABŞ təbii ki, qarşı çıxacaq. ABŞ istəməz ki, öz bostanı saydığı Yaxın Şərqə Rusiya qayıtsın. Rusiya de-fakto artıqYaxın Şərqə qayıdıb. Artıq Suriyada əməliyyatlar keçirir. Rusiya qərbi İraqa girsə, ABŞ nə edəcək? ABŞ uzağı bir neçə bəyanatlar verəcək.

Bütün olanlardan bir nəticə çıxır. Bədbəxt müsəlmanlar öz ölkələrini böyük dövlətlərin cıdır meydanına çeviriblər. Müsəlmanlar öz ölkələrində sabit, demokratik, xalqa söykənən dövlət qursaydılar bu vəziyyət də yaranmazdı. Bunun nəticəsidir ki, xarici qüvələr gəlib müsəlman ölkələrində at çapır, ortada da qırılan müsəlmanlardır".

Üçüncü dünya müharibəsinin başlaması ilə bağlı politoloqların fikrinə münasibət bildirən Zərdüşt Əlizadə qeyd etdi ki, "əgər o politoloqların evlərində soyuducu varsa, soyuducudan su töküb içsinlər, ağılları başlarına gəlsin. Üçüncü dünya müharibəsinin olması üçün nüvə bombalarından istifadə edilməlidir. Əgər nüvə bombalarından istifadə edilsə, Albert Eynşteynin dediyi kimi, dördüncü dünya müharibəsi çomaqlar və oxlarla olacaq".

Qeyd edək ki, Rusiya Suriyadakı əməliyatlara 30 sentiyabrdan başlayıb.

Səxavət Məmməd
Ölkə.Az