20 Yanvar günü alnından yaralanan həkim danışdı

1986-cı ildən bu günə kimi Abşeron rayonunda həkim, “Abşeron Rayon Mərkəzi Xəstəxanası” PHŞ-nin Aşağı Güzdək Ailə Sağlamlıq Mərkəzinin bölmə müdiri işləyən Nasir Əhmədov da 20 Yanvar hadisələrinin canlı şahidlərindəndir.

Ölkə.Az xəbər verir ki, həkim həm də 1990-cı ildə keçirilən ümumxalq mitinqinin iştirakçılarından biri olub. O, qanlı gecəni belə xatırlayır:

"Mən də vətənpərvər biri kimi həmin əhalinin içərisində idim. Əhalinin qarşısına çıxdıq, söhbət etdik. Dedik ki, tanklar gəlir, bizi qıracaqlar. O vaxtı Milli İstiqlal Partiyası, Xalq Cəbhəsinin liderləri insanları qızışdırıb qabağa saldı, özləri qaçıb getdilər. Mən də insanlarla birlikdə Salyan kazarmasına getdim. Orada çoxlu tank, BTR var idi. İnsanlara dedim ki, bu tanklar çıxsa, hamımızı öldürəcəklər. Dedilər, yox, çıxa bilməz. Maşınlardan barrikadalar düzəltmişdilər. Dedim ki, insanları öldürmək olmaz. Orada bizim azərbaycanlı zabitlər də var idi. Dedilər ki, heç kimə güllə atamayacaqlar. Bizə "kənara çəkilin" dedilər. Orada liderlərdən bəziləri bizə "çəkilməyin, lazım gəlsə, tankı da, BTR-i də məhv edərik" dedilər. Oradan bir neçə nəfər benzin götürüb tankın üstünə atdı, hərbi texnika yanmağa başladı. O tankın yanması, oradakıları bir qədər yubatdı. Həmin tank çıxsaydı, ardıcıl hamımızın üstündən keçərdilər. Həmin gecə insanları gülləbaran etdilər, hərə bir yana qaçdı. Tanklar gələn təcili yardım maşınlarına da atəş açdı. Bir neçə tibb işçiləri orada həlak oldu. Mən onlara yaxınlaşdım ki, yaralıları kənara çəkim, kömək edim. Sürücü vəfat etmişdi, digərləri yaralı idi. Yaralı insanları gətirdik Alatavada həyət evinə saldıq. Özüm də alın nahiyəmdən yaralanmışdım. Ayağıma da rezin güllələr dəymişdi.
Birinci rezin güllələr atdılar, sonra tanklarla maşınların üstündən keçdilər. Atəş açanlar muzdlu əsgərlər idi. İnsanları güllələyir, döyür, təhqir edirdilər. Onlarla söhbət etdim, dedim ki, əhaliyə bunu etmək olmaz. Məni də təhqir etdilər. 

Daldalanmaq üçün bir yerə getdik. Sonra oradan çıxıb bacımgilə getmək istədim. Gecə saat 3-ün yarısı olardı. Onlar da qapını bağlayıb getmişdilər. Səhərə qədər gülləbaran oldu. Səhərə yaxın atəş səsləri səngidi. Hər yer yaralı və meyitlə dolu idi. 

Atamgil rayondan gəlmişdilər, məni axtarırdılar.

O vaxt pis zamanlar idi. Qorxurduq ki, mənə cinayət işi açılar. Bizə "provakator", "ekstremist" deyirdilər".

Sonra televizorda baxdım ki, Heydər Əiyev Moskvada Azərbaycan nümayəndəliyinə gedərək öz etirazını bildirdi, 20 Yanvar hadisəsinə siyasi qiymət verilməsini tələb etdi və öz cibindən partiya biletini çıxarıb yerə atdı. 

Ulu öndər hər zaman Azərbaycan xalqına xidmət edib. Onun ruhu qarşısında baş əyirəm.Həmişə səhiyyə işçilərinə, o cümlədən mənə ata qayğısı göstərdiyi üçün minnətdaram",- deyə həkim əlavə edib.