Niftulla Əsgərov dəfn olunub - YENİLƏNİB
Əməkdar artist Niftulla Əsgərov dəfn olunub.
"Report"un cənub bürosu xəbər verir ki, mərhum Lənkəranın Girdəni kəndinin qəbiristanlığında torpağa tapşırılıb.
Dəfndə aktyorun ailə üzvləri, teatr kollektivi və ictimaiyyətin nümayəndələri iştirak edib.
***
Respublikanın Əməkdar artisti Niftulla Əsgərovla Lənkəran Dövlət Dram Teatrında vida mərasimi keçirilib.
"Report" xəbər verir ki, mərhumun tabutu son dəfə vidalaşmaq üçün teatrın səhnəsinə qaldırılıb.
Mərasimdə Lənkəran Şəhər İcra Hakimiyyətinin nümayəndələri, aktyorun ailə üzvləri, həmkarları və rayon ictimaiyyətinin nümayəndələri iştirak ediblər.
Teatrın müdiri vəzifəsini müvəqqəti icra edən İntiqam Hacılı Əməkdar artist Niftulla Əsgərovun yaradıcılıq yolundan danışıb.
Xalq artisti Qabil Quliyev mərhum aktyor haqqında danışarkən onun oynadığı rolların kiçik və ya böyüklüyünün heç bir əhəmiyyətinin olmadığını, hər bir obraza sevgi ilə yanaşdığını, öz dəsti-xətti ilə ifa etdiyini bildirib.
Çıxış edən kollektiv üzvləri də Niftulla Əsgərovun səhnəyə çıxdığı an tərəfmüqabillərinə xoş aura ötürməsindən, hər zaman pozitiv olduğundan danışıblar.
Vida mərasimindən sonra mərhumun cənazəsi dəfn olunmaq üçün doğulduğu Girdəni kəndinin qəbiristanlığına aparılıb.
***
Əməkdar artisti Niftulla Fətulla oğlu Əsgərov vəfat edib.
"Ölkə.az" xəbər verir ki, Niftulla Əsgərov uzun sürən xəstəlikdən sonra bu gün səhər saatlarında vəfat edib.
Qeyd edək ki, Niftulla Əsgərov 5 iyul 1959-cu ildə Lənkəran rayonunun Girdəni kəndində anadan olub. 1995-ci ildən Lənkəran Dövlət Dram Teatrının aktyoru kimi çalışıb.
Teatrda S.M.Qənizadənin “Xor-xor”əsərində Seyfulla, İ.Məlikzadənin “Gəl qohum olaq”ında Camal, H.Abbaszadənin “Həzi Aslanov”unda Bekişvilli, Ü.Hacıbəyovun “Olanlardan-keçənlərdən”ində Atamoğlan əmi, N.B.Vəzirovun “Hacı Qənbər”ində Qıdı Kirvə, E.İsgəndərzadənin “Qalxın, məhkəmə gəlir”ində Bəhruz, H. Mirələmovun “Vicdanın hökmü”ndə Aşot, B. Nuşiçin “Nazirin xanımı”nda Çeda, N.Nərimanovun “Nadir şah”nda Əliəşrəf bəy və s. obrazları canlandırıb.
