\"Sədərək\"də BMW ilə avtoşluq etdi, cərimə olundu
"Sədərək" Ticarət Mərkəzi ərazisində BMW markalı avtomobillə avtoşluq edən sürücü saxlanılıb.
Qaynarinfo-nun məlumatına görə, 1999-cu il təvəllüdlü Bakı şəhər sakini Zabit Hüseynov (ad-soyad şərti) saxlanılaraq barəsində İnzibati Xətalar Məcəlləsinin 511.1.3-cü maddəsi ilə protokol tərtib edilib və iş məhkəməyə göndərilib.
Məhkəmədə məlum olub ki, təqsirləndirilən şəxs Qaradağ rayonu, "Sədərək" Ticarət Mərkəzi ərazisində idarə etdiyi BMW markalı avtomobillə ictimai qaydanı və əhalinin dincliyini nümayişkaranə şəkildə pozaraq, nəqliyyat vasitəsini qəflətən sürətləndirməklə davamlı olaraq təkərlərini yolun səthi ilə sürtünməsi səslərinin çıxarılması və yolun səthində çoxsaylı təkər izlərinin buraxılması ilə müşayiət edilən avtoxuliqanlıq edib. Əldə edilmiş videogörüntülərə əsasən də onun avtoxuliqanlıq etməklə ictimai qaydanı və əhalinin dincliyini nümayişkaranə şəkildə pozması təsdiq olunub.
Məhkəmənin qərarı ilə təqsirləndirilən şəxs barəsində 1 il müddətinə nəqliyyat vasitəsini idarəetmə hüququndan məhrum edilməklə 500 manat məbləğində cərimə olunub.
