Sürücülərlə bağlı qanuna yeni təklifə RƏSMİ CAVAB

Qarlı və yağışlı havalarda sürücülərin gündüz işıqlarından istifadə etməməsinin təhlükəli vəziyyət yaratdığı deyilir. Sosial şəbəkələrdə sözügedən hava şəraitində gündüz işıqlarından istifadənin “Yol hərəkəti haqqında” qanuna daxil edilməsi müzakirə edilir.

Nəqliyyat sahəsi üzrə ekspert, “İnsan yönümlü şəhərlər” səhifəsinin rəhbəri Anar Əliyev “Ölkə.Az”a açıqlamasında bildirdi ki, qarlı və yağışlı havada görüntü məhdudiyyəti yarandığından sürücülər digər nəqliyyat vasitələrini vaxtında görməyə bilir:
⠀
“Məhz bu səbəbdən bütün yeni avtomobillərdə gündüz işıqları nəzərdə tutulur. Bir sıra Avropa ölkələrində sürücülər daima gecə-gündüz faralardan istifadə etməlidir. Moldova və Ukraynada bu qayda payız-qış aylarına aiddir”.
⠀
Ekspert deyir ki, Azərbaycanda payız-qış aylarında gündüz işıqlarından və yaxud avtomobillərdə həmin işıqlar nəzərdə tutulmayıbsa, yaxın vuran işıqlardan istifadənin məcburi olması və qanunvericiliyə daxil edilməsini təklif ediblər.

Bakı Şəhər Dövlət Yol Polisi İdarəsinin baş inspektoru, polis mayoru Araz Əsgərli “Ölkə.Az”a açıqlamasında əlavə dəyişikliklərə ehtiyac olmadığını bildirdi:

“Görüntü dairəsinin məhdud olması, xüsusilə dumanlı hava şəraiti üçün təchizatçılar avtomobillərə duman əleyhinə olan işıqlar quraşdırır. Belə hava şəraitində də sözügedən işıqlardan istifadə nəzərdə tutulur. “Yol hərəkəti haqqında” qanunun 50-ci maddəsində hava şəraitinin kəskin dəyişmsi, yəni meteoroloji vəziyyətin hərəkət imkanlarına təsir etməsi ilə bağlı bənd var. Burada qeyd olunur ki, hər bir sürücü meteoroloji vəziyyəti düzgün qiymətləndirməli, sürət həddini aşağı salıb ara məsafəsini artırmalıdır. Hər bir sürücünün hava şəraiti ilə bağlı atacağı addımların qanuni bazası bu maddədə qeyd olunub. Buna görə də, əlavə dəyişikliklərə ehtiyac yoxdur”.

A.Əsgərli deyir ki, işıq cihazlarından düzgün istifadə etməməyə görə “İnzibati Xətalar məcəlləsinin 329-cu maddəsində 30 manat məbləğində cərimə nəzərdə tutulur. 

“Hər şeyə görə cərimə tətbiq etmək, əlavə məsuliyyətlər yaratmağa ehtiyac yoxdur. Qanunda hər şeh açıq-aydın göstərilir, sadəcə hər kəs məsuliyyətli olmalıdır”, - deyə polis moyoru əlavə edib.

Könül
Ölkə.Az