Araz Əlizadə: \"Məlum oldu ki, bu iki qoçu İlqar Ağazadənin asfalt-beton zavodunun işçiləridir\"

Seçki yaxınlaşdıqca namizədlər arasında rəqabət də qızışmağa başlayıb

Ən gərgin dairələrdən biri də 35 saylı Xətai seçki dairəsidir. Burada 2013-cü il prezident seçkilərində də mübarizə aparmış Azərbaycan Sosial Demokrat partiyasının sədri Araz Əlizadə və Ümid partiyasının sədri İqbal Ağazadə bir-birlərinə rəqibdirlər.

İki partiya sədrinin rəqabəti artıq az qala düşmənçiliyə çevrilib.

Araz Əlizadə Ölkə.Az-a İqbal Ağazadə və rəqibinin qardaşı İlqar Ağazadə haqqında qalmaqallı məlumatlar verib:

"Dairə seçki komissiyasındakı səlahiyyətli nümayəndəm Günel Rauf qızı Babayevanın şikayəti əsasında oktyabrın 5-də İqbal Ağazadəyə seçki qanununu pozduğuna və seçiciləri satın almaq cəhdina görə, xəbərdarlıq edilib. Oktyabrın 7-də iki nəfər Günel Babayevanın evinə gəliblər. Evdə Günel Babayevanın anası olub. Hədə-qorxu gəliblər ki, biz onu özümüzlə aparmalıyıq. Günel Babayevanın anası onlara gələn şəxslərin maşınlarının nömrəsini yazıb, 50 BZ 661. Biz polisə müraciət etdik, polis onları saxladı. Məlum oldu ki, bu iki nəfər qoçu İqbal Ağazadənin qardaşı İlqar Ağazadənin Asfalt-beton zavodunun işçiləridir.

Onlar ifadəsində bildiriblər ki, İlqar Ağazadə tərəfindən Günel Babayevanın evinə göndəriliblər ki, səlahiyyətli nümayəndəm onları işə götürsün, onlar da mənim seçki "fırıldaqlarımı" toplayıb İlqar Ağazadəyə xəbər versinlər.

Bu ağıla sığan arqument deyil. Bir qızın evinə gəlirlər, deyirlər ki, o bizlə getməlidir. Sonra da ifadə verirlər ki, biz işə düzəlməyə gəlmişdik. Günel Babayevə işə adam götürəndir? Onların məqsədi əslində səlahiyyətli nümayəndəmi qorxutmaq olub. İndi o iki şəxs yaxalanıblar. Polis də bu haqda məlumat yayıb, ancaq mətbuat bunu niyə yazmır?"

Qeyd edək ki, Ümid partiyasının sədri İqbal Ağazadə və Azərbaycan Sosial Demokrat Partiyasının sədri Araz Əlizadə, hər ikisi 35 saylı Xətai seçki dairəsindən namizədliklərini veriblər və deputatlıq uğurunda onların arasında ciddi mübarizə gedir.

Səxavət Məmməd
Ölkə.Az