Rostovdakı Nərimanov küçəsində ev uçub: Sakinlər təxliyə ediliblər - VİDEO

Rusiyanın Rostov-na-Donu vilayətində beşmərtəbəli yaşayış binasının bir hissəsi uçub.

Bu barədə vilayət qubernatoru Vasili Qolubev məlumat verib.

Məlumata görə, Nəriman Nərimanov küçəsi, 72/3 ünvanında yerləşən qəzalı binanın birinci bloku uçub. Xoşbəxtlikdən sakinlər bir gün əvvəl təxliyə edildiyindən xəsarət alan olmayıb. Bina mühasirəyə alınıb.

Qolubevin sözlərinə görə, təxliyə edilmiş vətəndaşlar müvəqqəti yerləşdirmə məntəqəsində məskunlaşıblar. Binanın 26 sakini oradaca gecələyib.
Qeyd olunur ki, binanın blokunun bir divarı uçduğundan, xilasedicilər 95 nəfəri təxliyə ediblər. Daha sonra isə həmin blok tamamilə dağılıb.

Bildirilir ki, binada ümumilikdə 247 nəfər qeydiyyatdadır. Ümumilikdə qəzalı evdən 155 ailə köçürülməlidir.