“Universitetə MMC statusunun verilməsi etibar məsələsidir” - Ekspert

Universitetin təşkilati-hüquqi forması dəyişə bilər. Yəni universitet MMC-yə çevirilə bilər. Bəs MMC ünvanı alan universitetlərin digər universitetlərdən fərqləri nələrdir? Hansı tip universitetlər MMC sayılır?

Bu barədə Valyuta.az-a danışan təhsil eksperti Qoşqar Məhərrəmov bildirib ki, MMC universitetlərə publik hüquqi şəxs ünvanı qazandırır:

"Publik hüquqi şəxslər artıq şirkət olaraq qazanc əldə edə, əlavə maliyyə mənbələri tapa, məhsullarını və xidmətlərini sata, özü şəxsi müəssisə olaraq maliyyə əməliyyatları keçirə və maliyyə ilə əlaqədar müqavilələr bağlaya bilir. Bunlar hamısı universiteti daha avtonom edir, xüsusilə də maliyyə müstəqilliyi qazanmasına töhfə verir".

Ekspert belə universitetlərin gəlirlərindən də danışıb:

"Bu tipdə universitetlərin artıq gəlir mənbəyi sadəcə dövlət büdcəsi olmur, əldə etdiyi gəliri də sadəcə müəllim maaşına xərcləmir. Ənənəvi universitetlər, təəssüf ki, sadəcə dövlət büdcəsinə bağlıdır və aldığı büdcəni də müəllimin maaşına ödəyir. Beləliklə, onlar hansısa innovativ tədbir keçirəndə, bir işi yerinə yetirəndə onların maliyyə resursu olmur. Digər orta məktəblər kimi olur, yəni kiçik bir lampa belə qırıldıqda harasa müraciət edir ki, bu həll olunsun. Ona görə də buna çox ehtiyac var, sadəcə bu vaxta qədər universitetlərə bunun verilməməsinin səbəbi etibar məsələsidir. Hansı rektorlar etibar qazanırsa, bu universitet artıq yavaş-yavaş publik hüquqi şəxs olmaq yolunda irəliləyir".