Nazilənin cütlük haqda fikirlərinə sərt reaksiya - VİDEO

Tanınmış aparıcı, şairə Nazilə Səfərli tiktokda məşhurlaşan 32 yaşlı Ruslanla, 16 yaşlı Yeganənin nikahsız yaşamalarına sərt reaksiya verib.

Ölkə.Az xəbər verir ki, o video paylaşaraq 32 yaşlı oğlanı kəskin tənqid edib:

"Susuram ürəyim partlayır, danışıram başıma bəla gəlir. Ay 32 yaşındakı oğlan, 16 yaşında bir qızın nə boyu boyuna, nə huyu huyuna (xasiyyət-red.) uyğun gəlir. Nə deyib almısan? Anatomiya dərsindən başın çıxmır, bunu bildik. Sən onun əlində oyuncaqsan qabağında tullanıb düşürsən? Qız da sevincək olub, elə bilir özünə panda tapıb. Xəbərin var, qız səni özünə oynamağa oyuncaq kimi alıb. Birazdan ayılanda görəcəksən ki, necə oynamısan. Nənəmin sözü olmasın, qoy, bir az qönçələnsin, öz yerini görəcəksən. Onda sənə ağır zərbə olacaq. Ayıbdır, yekə oğlansan. 32 yaşındasan, sənin həyatda nə qədər təcrübən var. 16 yaşlı saf bir qızı yiyəsiz bilib almısan? Öz aləmində əylənmisən? Nə isə, çox söz deyə bilərəm", - deyə o söyləyib. 

N.Səfərlinin bu sözləri birmənalı qarşılanmayıb. Sosial şəbəkə istifadəçilərindən bəziləri onun paylaşımına "qüsuru olana ərə getmək olmaz?", "sənin oğlun o vəziyyətdə olsa, bu fikirdə olardın?", "hər kəsin öz həyatı var" və s. şərhlər yazıblar. Bununla belə N.Səfərlinin çıxışını haqlı hesab edənlər də olub.

Qeyd edək ki, fiziki məhdudiyyəti olan 32 yaşlı Ruslan hazırda 16 yaşlı Yeganə ilə nikahsız yaşayır. Yeganənin ailəsi fiziki məhdudiyyəti olduğu üçün onların ailə qurmasına razı olmadığından onlar bir-birinə qoşulub qaçıb.

Daxili İşlər Nazirliyi isə ötən gün Ruslan Məsiyev və Yeganənin Mingəçevir Şəhər Polis Şöbəsinə dəvət edildiyini açıqlayıb. Qeyd edilib ki, yaşa görə qanunla icra hakimiyyətinin müvafiq qərarı ilə nikah tezləşdirilə bilər. Yaxın günlərdə qızın 17 yaşı tamam olduğuna görə rəsmi nikah bağlanılacaq.

Billurə