Biznesin uğurlu olması üçün neçə il gözləməliyik?

Bir çox bizneslərdə müəyyən qədər vaxt keçdikdən sonra bu biznesin uğurlu olub-olmaması anlaşılmır, ya çox vaxt tələb edir, ya da gəliri az olur. Bu da normal olaraq insanlarda tərəddüd yaradır ki, görəsən, bu biznesə davam edim, ya yox? Ümumiyyətlə, biznesimizin gələcəyinin uğurlu olub-olmamasını necə müəyyən edə bilərik? Burada hansı məqamlara diqqət yetirmək lazımdır?

Biznes təlimçisi Mübariz Quliyev Valyuta.az-a bildirib ki, bu biznes subyektinin istiqamətinə görə dəyişir:

“Məsələn, siz təhsil şirkəti yaratmısınızsa, bir-iki il müddətində effektli nəticə ala bilməzsiniz, ən az üç-dörd il vaxt lazımdır. Əgər, bu biznes restoran sahəsindədirsə, buna da ən azı bir-iki il vaxt lazımdır ki, bu biznes oturuşmuş forma alsın. Digər bütün bizneslərə də öz davamiyyətini qorumaq üçün ən az iki ilə qədər vaxt lazımdır. Ümumi olaraq müəyyən dövriyyə varsa, sadəcə olaraq gəlirlər qənaətbəxş deyilsə, burada problem biznesdə deyil, onu formalaşdıran komandadadır”.

Təlimçi bildirdi ki, biznesin illik xərclərindən əlavə 10-20% gəlir gətirməsi ilk il üçün normaldır: “Bu tip gəlir varsa, gələcəkdə uğurlu ola bilər. Məsələn, 10 min gəliri olan bir biznesin xərclərini çıxandan sonra 1000-2000 mənfəət gətirməsi qənaətbəxş haldır”.

Bunun spesifik məsələsi olduğunu, biznesə görə dəyişdiyini qeyd edən bines mentor öz təcrübəsini də bölüşüb:

“Məsələn, mənim elə biznesim olub ki, bir il gəlir olmayıb, qazanılan məbləğ sadəcə xərcləri qarşılayıb. Amma bir ildən sonra bu biznesin yolları açılıb və gəlirləri düzəlib”.