“Cənubi Qafqazda sülh: Azərbaycanda Rusiyanı nə gözləyir?” - KİV
Rusiya Beynəlxalq Məsələlər Şurasının saytında “Cənubi Qafqazda sülh: Azərbaycanda Rusiyanı nə gözləyir?” sərlövhəli analitik material dərc olunub.
AZƏRTAC xəbər verir ki, məqalənin müəllifi “Vestnik Kavkaza” informasiya-analitik agentliyinin baş direktorunun müavini Andrey Petrovdur.
Məqalədə qeyd olunur ki, hazırda regionda tamamilə fərqli vəziyyət yaranıb: Cənubi Qafqaz 100 faiz təhlükəsiz və sabit məkana çevrilib. Potensial risklər hələ də mövcuddur, amma onların reallaşdırılması üçün siyasi və maddi resurslar yoxdur. İndi Cənubi Qafqaz de-yure olmasa da, de-fakto sülh regionudur.
Müəllif yazır ki, əsas sabitləşdirici amil region dövlətlərinin heç birinin yeni müharibədə maraqlı olmamasıdır. Azərbaycan Ermənistan ərazilərinə iddia etmir, Ermənistan da Azərbaycana qarşı ərazi iddialarından imtina edib (hərçənd, Ermənistan konstitusiyasından onları silib atmaq lazımdır).
A.Petrovun fikrincə, əgər Rusiyanın Ermənistanla münasibətlərdə qeyri-müəyyənlikləri aradan qaldırmaq və əlaqələrin əvvəlki səviyyəsini bərpa etmək üzrə görüləcək çox işi varsa, bunun əksinə, Qarabağ müharibəsini təkcə özü üçün deyil, həm də bütün region üçün udmuş Azərbaycan ilə təmaslarla bağlı hazırda inamla söyləmək olar ki, müttəfiqlik qarşılıqlı fəaliyyətinin perspektivləri yeni tarixi mərhələyə qədəm qoyub.
Eyni zamanda, regional və dünya güclərinin satellitlərinə çevrilməyi üstün tutan analoji miqyaslı bir çox dövlətlərdən fərqli olaraq, Azərbaycan bütün xarici əlaqələrində öz müstəqilliyini qorumağa səy göstərir.
Müəllif sonda yazıb: “Rusiya və Azərbaycanın xarici siyasət kurslarının fundamental əsaslarını onların münasibətlərinin müstəsna konstruktiv istiqaməti müəyyən edir. Bu münasibətləri qorumaq lazımdır, çünki regiondan kənar qüvvələr Cənubi Qafqazı yenidən çalxalamaq cəhdlərindən əl çəkməyəcəklər. Amma həm Moskvada, həm də Bakıda milli maraqların müdafiəsi prioritet məsələdir”.
