Həyatınızı xilas edəcək cihaz - Harada və neçəyədir? 

Son zamanlar dəm qazı sözün əsl mənasında insanlar üçün qorxulu yuxuya çevrilib. Qış fəsli başlayandan demək olar ki, hər gün dəm qazından boğulma və ölüm halları ilə bağlı bədbəxt hadisələrin şahidi oluruq. 

Texniki təhlükəsizlik ekspertləri və Fövqəladə Hallar Nazirliyi əməkdaşları dəfələrlə bu cür hadisələrdən qorunmaq üçün vətəndaşları qaz detektorlarından istifadə etməyə çağırıb. Dəm qazı özlüyündə qoxusuz və rəngsiz olduğu üçün onu müəyyən etməyin yeganə yolu məhz bu cihazların hamam və mətbəxlərə quraşdırılmasıdır. Bəs görəsən ölkədə qaz detektorlarının satışı ilə bağlı vəziyyət necədir? Bir çox mütəxəssislər bu cihazların istehsalında və satışında xüsusi lisenziyanın tələb olunduğunu bildirir. 

Yenisabah.az satışda olan qaz detektorlarının qiymətlərini araşdırıb. Bazarda bu cihazların qiyməti işlənmiş və yeni olmasından asılı olaraq, 20 manatdan 300 manata aralığında dəyişir. Qaz detektorları özlüyündə müxtəlif cür olur. Bəziləri qaz sızmasına qarşı sayğaclara qoşulduğu halda, bəziləri isə hamam və mətbəx otaqlarına quraşdırılır. Bu cür cihazların satışı ilə məşğul olan satıcılardan biri qeyd edib ki, son zamanlar dəm qazından baş verən bədbəxt hadisələrlə bağlı qaz detektorlarına tələbat artıb. 

“Qaz detektorlarının satışı ölkədə çoxdan var. Bu aparat evdə karbonmonoksit, dəm qazı və tüstü yayıldıqda səs və işıq funksiyaları ilə xəbərdarlıq edir. Əvvəllər smart sayğacların üzərində qoyulan reduktorlar sızıntılar vaxtı qazın axışını dayandırırdı. İndi isə “pitiminutka” və kombilərdən çıxan uqarın hamamlara yayılmasını bilmək üçün bu detektorlar var. Qiymətlər fərqlidir. 200-300 manata olan detektorlar smart sistemlə çalışır və Wifi, GSM vasitəsi ilə hansısa sızıntı və qaz kəsintisini birbaşa mobil telefonlara ötürür. Vətəndaşların təhlükəsiz formada qaz cihazlarından istifadəsi üçün bu detektorlardan istifadə etmək tövsiyə olunur. İnsanların cibinə uyğun hər qiymətə var”. 

Qeyd edək ki, yanğın detektorları və reduktorlarını qaz cihazlarının satıldığı istənilən mağaza və satış məntəqəsindən əldə etmək olar. Əlavə olaraq onlayn satış platformalarından da sifariş etmək də mümkündür.