Azərbaycanda daha bir yanğın: Sakinlər təxliyə olundu -YENİLƏNİB
Qaradağ rayonunun Yeni Müşfiq qəsəbəsində baş verən yanğın söndürülüb.
Fövqəladə Hallar Nazirliyindən (FHN) Ölkə.az-a verilən məlumata görə, nazirliyin “112" qaynar telefon xəttinə Bakı şəhərinin Qaradağ rayonu Yeni Müşfiq qəsəbəsində binada yanğın baş verməsi barədə məlumat daxil olub.
Məlumatla əlaqədar dərhal əraziyə FHN-in Dövlət Yanğından Mühafizə və Xüsusi Riskli Xilasetmə xidmətlərinin qüvvələri cəlb olunub.
Hadisə yerində əməliyyat şəraiti qiymətləndirilərkən beşmərtəbəli yaşayış binasının 3-cü mərtəbəsində yerləşən mənzildə yanğın baş verdiyi müəyyən edilib.
Əməliyyat şəraitinə uyğun olaraq həyata keçirilmiş zəruri və təxirəsalınmaz tədbirlər sayəsində yanğın genişlənməsinə imkan verilmədən qısa müddətdə söndürülüb.
Yanğın nəticəsində beşmərtəbəli yaşayış binasının 3-cü mərtəbəsində ümumi sahəsi 75 kvadratmetr olan üçotaqlı mənzilin bir otağının yanar konstruksiyaları 18 kvadratmetr sahədə yanıb. Qonşu mənzildə köməksiz vəziyyətdə qalan azyaşlı xilas edilərək aidiyyəti üzrə təhvil verilib. Təhlükəsizlik tədbirləri çərçivəsində bina sakinləri təxliyə ediliblər.
Mənzilin böyük hissəsi və bitişik mənzillər yanğından mühafizə olunub.
***
Qaradağ rayonunda yanğın hadisəsi baş verib.
Fövqəladə Hallar Nazirliyindən Ölkə.az-a verilən məlumata görə, sakinlər binadan təxliyə ediliblər.
Əraziyə Fövqəladə Hallar Nazirliyinin Dövlət Yanğından Mühafizə və Xüsusi Riskli Xilasetmə xidmətinin qüvvələri cəlb olunub. Təhlükəsizlik tədbirləri çərçivəsində bina sakinləri təxliyə olunub. Yanğından mübarizə tədbirləri davam etdirilir.
