Politoloq: \"Rusiyanın bölgəyə girməsi bütün maraqları və planları alt-üst etdi\"

Terror artıq Türkiyənin paytaxtına qədər gəlib çıxıb

Türkiydə parlament seçkilərindən sonra koalisiyanın qurulmayacağı məlum olduğu bir vaxtda ölkəni terror dalğası bürüdü. İndi Türkiyədə təkrar parlament seçkilərinə az zaman qalıb və ölkə paytaxtı Ankarada belə dəhşətli terror aktının baş verməsi ağıllarda sual işarələri yaradır. Hər iki irimiqyaslı terror aktında ölənlər kürd kökənli Türkiyə vətəndaşları olub. Hadisə Türkiyənin dövlət orqanları tərəfindən araşdırılır.

Bölgədəki proseslər və Türkiyənin hazırkı vəziyyətini Türk-Slavyan Hərəkatının lideri, Avrasiya iqtisadi əməkdaşlıq institutunun ekspertlər şurasının üzvü Adıgözəl Məmmədov Ölkə.Az-a verdiyi açıqlamasında şərh edib:

"Bir müddət əvvəl Türkiyə həm PKK-ya, həm də HDP-yə qarşı açıq şəkildə hərbi müdaxilə etdi. Türkiyə həm ölkə daxilində, həm Şimali İraqda, həm də Suriyanın şimalında əməliyyatlara başladı. Bu əməliyyatların əvvəlindən axırına qədər NATO Türkiyənin arxasında dayanmadı. NATO Türkiyəni ərazi bütövlüyü, dövlət suverenliyi uğrunda gedən mübarizədə tək buraxdı. Bir müdət sonra bölgədə daşlar yerini dəyişdi. İŞİD-in Suriyadakı fəaliyyəti nəzarətçi fəaliyyət idi. Bu qədər geniş bir ərazidə, təməli və bünövrəsi olmayan bir təşkilatın var-gəl etməsi başqa güclərin maraqlarına xidmət edir. Avropa və ABŞ İŞİD-dən istifadə edərək Suriyanın mərkəzi hakimiyyətini dəyişmək istəyirdi.

Rusiyanın Suriyada və bölgədə də maraqları var idi. Bundan əlavə Rusiyanın Suriyada böyük hərbi bazası yerləşir. Rəsmi Moskva o baza ilə Aralıq dənizinin böyük hissəsinə nəzarət edir. Rusiyanın Suriyaya girməsində İsrail də maraqlı idi. Ona görə ki, İsrail bilmir ki, Bəşər Əsəd hakimiyyətdən getsə, onun yerinə gələnlər İsrailə qarşı necə davranacaq. Bölgədə həm də Səudiyyə Ərəbistanı faktoru güclənirdi. Rusiya ilə Suriya arasında razılıq əldə olunandan sonra Rusiya qırıcı-bombardmançıları Suriya ərazisində əməliyyatlara başladı.

Rusiyanın bölgəyə girməsi bütün daşları, maraqları, planları alt-üst etdi. ABŞ və Avropa Türkiyəni qaza gətirib Rusiya ilə qarşılaşdırmaq istəyirdi. Ancaq Rusiya ilə Türkiyə yaxınlaşmaqdadır. Rusiyanın bölgəyə girişi ilə çaş-baş qalan ərəb şeyxləri artıq Putinə itaət etməyə başlayırlar. Rusiya regionu Avropa, ABŞ-la deyil, Türkiyə ilə paylaşmaq istəyir.
Türkiyədə terror qurbanı olanlar kürd kökənli Türkiyə vətəndaşlarıdır. Demək bu Türkiyə daxilində də iqtidarı yıxmaq üçün bir cəhddir. Qarşıdan seçkilər gəlir. Bu terror aktı Türkiyə siyasi rəhbərliyinin xalq arasındakı etibarını sarsıtmaq istəyənlərin işinə yarayır".

Qeyd edək ki, Türkiyədə təkrar seçki 1 noyabrda baş tutacaq.

Səxavət Məmməd
Ölkə.Az