Qamət Süleymanov: "Dini Qurumlarla İş üzrə Dövlət Komitəsi dini qurum deyil"
Ərəstun Oruclu: "Hakimiyyət hər sahəyə "ağına bozuna baxmadan" təyinatlar edir", Cəmil Həsənli: "Bu hakimiyyətin yeritdiyi bütün siyasət səhvdi", Qamət Süleymanov: "Dini Qurumlarla İş üzrə Dövlət Komitəsi dini qrum deyil"
Azərbaycan prezidenti İlham Əliyevin sərəncamı ilə Dini Qurumlarla İş üzrə Dövlət Komitəsinə Mübariz Qurbanlı təyin edilib. Mübariz Qurbanlının bu cür strateji vəzifəyə təyin edilməsi isə birmənalı qarşılanmayıb. Mübariz Qurbanlının təyinatını politoloq Ərəstun Oruclu, Milli Şuranın sədri Cəmil Həsənli və Əbu Bəkr məscidinin axundu Qamət Süleymanov Olke.az-a şərh edib.
Ərəstun Oruclu Mübariz Qurbanlının Dini Qurumlarla İş üzrə Dövlət Komitəsinə təyinatını çox təcüblə qarşılayıb.
Politoloqun sözlərinə görə, bu vəzifəyə ən azından bu sahə ilə bağlı bilgisi olan, elmi iş təqdim etmiş birini təyin etməli idilər.
"İndiki vəziyyətdə dini qruplaşmalar arasında baş verən gərginliyi nəzərə alaraq daha ciddi birini bu vəzifəyə təyin etmək lazım idi. Seçkidən sonra görünən odur ki, hakimiyyət hər sahəyə "ağına bozuna baxmadan" təyinatlar edir. Bu təyinat da o tipli təyinatlardandır. Mübariz Qurbanlının Dini Qurumlarla İş üzrə Dövlət Komitəsinə təyinatı çox uğursuz bir seçimdir", deyə politoloq bildirib.
Cəmil Həsənli isə Mübariz Qurbanlı barədə şərh vermiyəcəyini bildirdi.
"Mən ayrı ayrı şəxsləri şərh etmək istəmirəm. Mən təyinatların yox, bütövlükdə sistemin səhv olduğunu deyirəm. Bu hakimiyyətin yeritdiyi bütün siyasət səhvdir", Milli Şuranın sədri belə deyib.
Qamət Süleymanov Dini Qurumlarla İş üzrə Dövlət Komitəsinə geniş dini bilgiləri olan birinin rəhbər təyin edilməsinin tərəfdarı olduğunu bildirdi.
Qamət Süleymanovun sözlərinə görə, "Dini Qurumlarla İş üzrə Dövlət Komitəsi dini qurum deyil, dövlət komitəsidir. Ona görə də, təəccüblü deyil ki, dövlət nümayəndəsi o vəzifəyə təyin edilsin. Dini Qurumlarla İş üzrə Dövlət Komitəsinin əsas funksiyası da dövlətlə dinin arasını normallaşdırmaqdır ancaq rəhbər ilahiyyatdan məlumatlı olan biri olsa idi daha yaxşı olardı. Hər halda yaddan çıxarmaq olmaz ki, Mübariz Qurbanlı tək deyil o idarədə. Ona orda kömək edəcəklər. İş əsnasında görsənəcək ki, Mübariz Qurbanlı bütün dinlərə, qruplara hansı məsafədə yanaşacaq və işləyəcək".
Səxavət MƏMMƏD
Ölkə.az
