ABŞ və NATO-dan Rusiyaya Navalnı hücumu
ABŞ dövlət katibi Entoni Blinken rusiyalı müxalifət lideri Aleksey Navalnının ölümünə görə Rusiya Prezidenti Vladimir Putinin məsuliyyət daşıdığını deyib.
Ölkə.Az "Independent"ə istinadən xəbər verir ki, Blinken Münxendə jurnalistlərə açıqlamasına bildirib ki, Rusiya antikorrupsiya aktivistini “təqib edib, zəhərləyib və həbs edib”.
“Buna görə Rusiya məsuliyyət daşıyır”, - Blinken vurğulayıb.
Böyük Britaniya Baş naziri Rişi Sunak isə Navalnının ölümünün dəhşətli xəbər olduğunu deyib.
"Rusiya demokratiyasının ən şiddətli müdafiəçisi kimi Aleksey Navalnı bütün həyatı boyu inanılmaz cəsarət nümayiş etdirdi", - Sunak qeyd edib.
NATO Baş katibi Yens Stoltenberq isə deyib ki, Rusiya bəzi suallara ciddi şəkildə cavab verməlidir.
O qeyd edib ki, Navalnının ölümü ilə bağlı bütün faktlar müəyyən edilməlidir.
