MİT-dən Fransız kəşfiyyatına sürpriz

Türkiyə Milli Kəşfiyyat İdarəsinin İsrail, İran və Rusiya məxfi xidmətlərinə qarşı həyata keçirdiyi casusluq əməliyyatlarından sonra bir müddət əvvəl Fransa Xarici Kəşfiyyat Xidmətinin (DGSE) casuslarına qarşı da əməliyyat keçirib.

Ölkə.Az xəbər verir ki, "Sabah" qəzetinin yazdığına görə, MİT Əks-Kəşfiyyat İdarəsi (İKK) ilə İstanbul Region Müdirliyinin birgə işi nəticəsində Fransa Kəşfiyyat Xidmətinə (DGSE) 1 ildir, Türkiyədə casusluq etdiyi təsbit edilən 3 nəfərdən ibarət qrup ifşa  edilərək saxlanılıb.

"Sabah" yazır ki, MİT aylardır, addım-addım izlədiyi 3 fransız casus İstanbul Polis İdarəsinin son günlərdə keçirdiyi əməliyyatla ələ keçib. İfşa edilən qrupun işi Türkiyəni beynəlxalq aləmdə nüfuzdan salmaq üçün saxta məlumatlar hazırlamaq və Türkiyənin qaçqın siyasəti ilə bağlı xarici kəşfiyyat xidmətlərini əvvəlcədən məlumatlandırmaqdan ibarət olub.

Mürtəza
Ölkə.Az