“Rusiyaya göndərdiklərimizi gizlətməli deyilik” – İran rəsmisi

İran Rusiyaya çoxlu güclü “yer-yer” ballistik raketləri verib. 

Ölkə.Az xəbər verir ki, bu barədə “Reuters” altı mənbəyə istinadən məlumat yayıb.

“Bunu gizlətmək üçün heç bir səbəb yoxdur. İstədiyimiz ölkəyə silah ixrac etmək icazəmiz var”, - deyə İran rəsmilərindən biri agentliyə bildirib.

İranın üç mənbəsi agentliyə bildirib ki, Tehran Rusiyaya 400-ə yaxın raket verib. "Onların da çoxu “Fateh-110” qısa mənzilli ballistik raketlər ailəsinə aiddir. Xüsusilə söhbət 300-700 kilometr məsafədəki hədəfləri vura bilən “Zülfiqar” raketlərindən gedir", - o qeyd edib.

İranlı mənbələrdən birinə görə, İran və Rusiya hərbçiləri arasında Tehran və Moskva görüşləri zamanı əldə olunmuş razılaşmanın şərtlərinə əsasən, çatdırılmalar yanvarın əvvəlində başlayıb.

“Reuters” əlavə edib ki, İranın Müdafiə Nazirliyi bu məlumatı şərh etməkdən imtina edib.

Mürtəza
Ölkə.Az