Erməni nəşri: "Sirr deyil ki, bu, Əliyevin diplomatiyasının çevikliyinin nəticəsidir"
"Ermənistan-Rusiya siyasi münasibətlərinin hazırkı gərginləşməsi ilə məşğul olan Ermənistan ictimaiyyətinin əksəriyyəti regional münasibətlərin digər sahəsinə, Rusiya-Azərbaycan münasibətlərinə məhəl qoymur. Bu arada onu diqqət mərkəzində saxlamaq, az-çox xəbərdar olmaq həm ümumi regional siyasi atmosferi anlamaq, həm də ətrafımızda baş verənləri təsəvvür etmək üçün vacibdir. Moskva-Bakı münasibətləri müəyyən mənada unikaldır".
Ölkə.Az xəbər verir ki, bu barədə erməni nəşri "hraparak" yazır.
Qəzet daha sonra yazır:
"Belə görünür ki, Azərbaycan lideri İlham Əliyev ən azı indiyədək Ukrayna və Rusiya ilə yaxşı münasibətlər qurmağı bacarır. Bu necə mümkündür? Azərbaycan diplomatiyası haqqında çox danışmadan demək olar ki, sirr elə həmin diplomatiyanın çevikliyindədir".
Nəşr qeyd edir ki, Azərbaycan bu baxımdan müstəqil və düzgün balanslı xarici siyasət yürütməklə uğur qazanır və bununla da həm Qərblə, həm də Rusiya ilə normal münasibətlərini inkişaf etdirir.
Nəşr onu da yazır ki, İrəvanın yürütdüyü uğursuz xarici siyasət Ermənistanı daha çıxılmaz dalana sürükləyir.
"Hraparak" onu da yazır ki, Bakının yürütdüyü uğurlu xarici siyasəti ilə yanaşı, Rusiya-Azərbaycan iqtisadi münasibətləri də iki ölkə arasındakı münasibətlərdə xüsusi rol oynayır:
"Xarici siyasi komponenti ilə yanaşı, Rusiya-Azərbaycan münasibətlərinin hazırkı vəziyyətini başa düşmək üçün onların iqtisadi komponentini də dəyərləndirmək vacibdir. Burada qarşılıqlı investisiyalar və ticarət dövriyyəsi hər iki tərəfdən, xüsusilə tələbat olan məhsul və ərzaq məhsulları sahəsində aktiv əməkdaşlığı qeyd etmək lazımdır. 2023-cü ilin rəsmi statistikasına görə, Rusiyadan Azərbaycana 1,3 milyon ton taxıl məhsulları idxal edilib. Azərbaycan da öz növbəsində Rusiya bazarına milyonlarla toyuq yumurtası ixrac edib.
2023-cü ildə Azərbaycandan Rusiyaya 60 milyon ədəd yumurta ixrac edilib. Bu il bu rəqəm 100 milyonu keçə bilər. Artıq Rusiya Birləşmiş Ərəb Əmirlikləri və bir sıra digər ölkələrlə birlikdə Azərbaycandan toyuq yumurtasının əsas istehlak bazarına çevrilib. Burada həm də Rusiya-Türkiyə münasibətlərinin hazırkı vəziyyətini nəzərə almaq vacibdir. Onu da qeyd edək ki, Rusiya-Azərbaycan ticarət dövriyyəsi 17 faiz artaraq 4,4 milyard dollara çatıb. Bununla da Rusiya Azərbaycanın üçüncü ticarət tərəfdaşı olub".
Mürtəza
Ölkə.Az
