\"Yeni Osmanlı ideyası Türkiyənin baş ağrısına çevrilib\"

"Həm Türkiyə, həm Azərbaycan bilməlidir ki, avtoritar ölkələrlə dostluq etmək olmaz"

Türkiyədə parlament seçkilərinə az müddət qaldığı bir zamanda terror aktı baş verib. Bəziləri iddia edir ki, bunu Ərdoğan hökuməti edib, bəziləri bunu PKK-nın etdiyini, bəziləri isə terror aktında Rusiyanın əlinin olduğunu bildirir. İŞİD isə terror aktını öz üzərinə götürüb.

Türkiyədə baş verən prosesləri D18 hərəkatının sədri, millət vəkillliyinə namizəd Ruslan İzzətli Ölkə.Az-a şərh edib:

"Türkiyədə baş verən son terror olayları onu göstərir ki, AKP hökumətinin istədiyi türk-kürd qardaşlığı baş tutmayacaq. Ona görə ki, həm daxildə, həm də xaricdə bunu istəməyən qüvvələr var. Baş verən son terror olayı isə seçki öncəsi Türkiyənin qarışdırılması deməkdir. AKP son 10 ildir gizli olaraq apardığı böyük orta doğu, aşkar şəkildə isə yeni Osmanlı planı öz nəticəsini vermir. AKP hökumətinə qədər Türkiyənin xarici siyasəti həm qərbin yanında olmaq, həm də öz gücünü göstərmək idi. Ancaq indi Rusiya Türkiyə sərhəddini pozur. Buna nə Qərb, nə də NATO ciddi reaksiya vermir.

Türkiyə iqtisadi cəhətdən güclənib genişlənsə də, yeni Osmanlı ideyası Türkiyənin baş ağrısına çevrilib. Türkiyə yenidən əvvəl əməkdaşlıq etdiyi ölkələrlə əməkdaşlıq etməlidir. Türkiyənin Qərblə münasibəti çox soyuqdur, Rusiyaya isə güvən yoxdur. Həm Türkiyə, həm Azərbaycan bilməlidir ki, avtoritar ölkələrlə dostluq etmək olmaz. Bu cür ölkələr üçün nə beynəlxalq hüquq, nə də insan hüquqları yoxdur".

Qeyd edək ki, Türkiyədə təkrar parlament seçkiləri 1 noyabr tarixində keçiriləcək.

Ölkə.Az