Əli sabunlu, başı şampunlu əməkdar artist kimdir?

İntiqam VALEHOĞLU

Deyir qulaq gündə bir söz eşitməsə, kar olar. Nə qədər ki, kar olmamışıq, deməli, eşitdiyimiz təzə nələrsə var.

Mətləbə keçməmişdən əvvəl istəyirəm bir az dərdləşək. Bir də görəcəyik ki, gedib çıxmışıq mətləb üstünə. İndi zəmanə elədir ki, hamı sabun əlində, şampun cibində "giriş"də dayanıb, növbəsini gözləyir. Bəzən görürsən ki, kimsə istəmədən növbəni pozmalı olur. Növbəsinə girdiyi adam etiraz edəndə, deyir ki, ay balam, görmürsən sabun quruyur, bir "ponyatkan" olsun da.

Tağı Əhmədovun sözü olmasın, bu tendensiya o qədər geniş yayılıb ki, gəlib müəllimlərə kimi çatıb. Şübhəsiz ki, ilin günün bu vaxtı da müəllim adını layiqincə daşıyan insanlar var. Az da olsa... Deyəsən dərdləşə-dərdləşə mətləbə yaxınlaşırıq.

...Bu günlərdə eşitdiyim bir xəbər məni xeyli pəjmürdə edib, yoldaşlar. Neyçün ki, söhbət təkcə müəllimdəm yox, həm də incəsənət aləmində az-çox tanınan simalardan birindən gedir. Həmin bu şəxs Mədəniyyət və İncəsənət Universitetində müəllim işləyir. Məlumunuz olduğu kimi, bu universitetə də ötən ildən Fərəh Əliyeva rektor təyin olunub. Bilməyənlər üçün ərz edim ki, Fərəh xanım Azərbaycan jurnalistikasının canlı ensiklopediyası hesab edilən Şirməmməd Hüseynovun qızıdır. Yəni, ziyalı ailədə böyüyüb, tərbiyə alıb və sair.

...Hörmət etdiyim və dürüstlüyünə zərrə qədər şübhəm olmayan bir dostumuzun dediyinə görə, Fərəh xanımın rektoru olduğu universitetdə dərs keçən müəllimlərdən biri çox "orijinal" metoda əl atıb. O əvvəldə dediyim sabun-şampun söhbəti var idi ha, bax ora gəlirəm.

Deməli, bu müəllim hər gün səhər tezdən dərs keçdiyi tələbələrin bir qrupunu yığır universitetin qarşısına, hamısının da çiynində əsgər "veş meşok"una bənzər bir şey. Uşaqlar binanın qabağında ora qaçırlar, bura qaçırlar. Bir-birini ötən kim, iki təkər qaldırıb, yerindən üçüncü "skorost"la götürən kim. Elə ki, rektor Fərəh xanımın işə gəlməyinə dəqiqələr qalır, müəllim həmin tələbələrdən tələb edir ki, ancaq yaxın ərazidə qaçın. O necə ki, Bakıya təzə marşrut avtobuslar gələndə birinci Hökumət Evinin qarşısına düzürlər ha. Bax elə o cür də təsəvvürünüzdə canlandırın. Nəysə, rektor iş otağına qalxandan sonra müəllim tələbələri yığıb aparır auditoriyaya. Məqsəd də odur ki, görün, mən işləyirəm.

Elə yazını yaza-yaza xarici saytlara nəzər saldım, axtardım, aradım ki, bəlkə dünyanın hansısa ali məktəbində belə bir qayda var, mənim xəbərim yoxdur. Amma nə illah elədimsə, rast gəlmədim. Google-da "Sabun" və "müəllim" sözlərini bir yerdə yazdım ki, bəlkə nəsə çıxsın, yenə də nəticə hasil olmadı.

Ona görə belə qərara gəldim ki, sözügedən yeniliklə bağlı bəzi təkliflər irəli sürüm. Ola bilər ki, işlərinə yaradı. Fikrimcə, həmin müəllimin dərs keçdiyi bütün auditoriyalarda hamam quraşdırılmalıdır. Çünki yaşlı, cavan fərq etməz, insan qaçandan sonra tərləyir. Tərli-tərli dərsdə oturmaq həm sağlamlıq baxımından düzgün deyil, həm də gigiyenik anlamda müsbət hal sayılmır. İkincisi, məhz həmin müəllimin dərslərində tələbələrə auditoriyada hamam xalatı ilə oturmağa icazə verilməlidir. Çünki tələbə hamamdan çıxandan sonra dərhal öz paltarını geyinsə, soyuq ola bilər.

Bəs soruşa bilərsiniz ki, həmin müəllim də xalat geyinə bilərmi? Cavab verirəm-bəli. Özü də qırmızı xalat. Çünki müəllim tələbədən mütləq və mütləq seçilməlidir.

Rektorun gəlişi zamanı ən yaxşı qaçan tələbə mükafatlandırıla bilər. Necə? Bunun da çox asan yolu var. Auditoriyadakı hamamdan 20 dəqiqə artıq istifadə edə bilər.

Bəs yaxşı qaçmayan tələbələrə hansı cəzalar tətbiq edilməlidir? Təbii ki, yaxşı qaçmayan tələbə hamama buraxılmır. Çünki müəllimin sözünə qulaq asmayan tələbə iylənə-iylənə dərsdə otursa, yaxşıdır. Qoy canı çıxsın, gələn dəfə əziyyət çəkib yaxşı qaçsın. Kimdən artıqdır ki?

Yazının son cümlələrini yazarkən aldığım daha dəqiq məlumata görə, həmin müəllim həm də əməkdar artistdir. Adını da dedilər, amma yazmağı lazım bilmədim. Ancaq bu cümləni yazmağım mütləqdir və lazımdır-əlisabunlu, başışampunlu olmaq heç də yaxşı iş deyil, müəllim!

Ölkə.az