Navalnı hansı komandirlə dəyişdirilməli idi? - Ölməsəydi bunlar olacaqdı

Cəzaçəkmə müəssisəsində olan Aleksey Navalnı mübadilə ərəfəsində dünyasını dəyişib.

Ölkə.Az Almaniya nəşri “Bild”ə istinadən xəbər verir ki, o, yaxın həftələrdə və ya aylarda Berlindəki Tierqarten parkında keçmiş çeçen komandiri öldürən rusiyalı Vadim Krasikovla dəyişdirilə bilərdi. Putin özü amerikalı Taker Karlsona müsahibəsində mümkün mübadilədən danışıb.

“Bild”in məlumatına görə, həqiqətən də mümkün mübadilə ilə bağlı danışıqlar aparılıb. Danışıqlarda Rusiya, ABŞ və Almaniyanın nümayəndələri iştirak ediblər.

"Navalnının ölümü həqiqətən də Putin sisteminin nə qədər qeyri-sabit olduğunu göstərir. Vəziyyət stabil olsaydı, Kreml rəqiblərini həbs etməli, işgəncə verməli və öldürməli olmazdı. Xarici dünyaya Putin özünü elə aparır ki, sanki öz gücünə 100% arxayındır. Amma bu akt onun Rusiya müxalifətindən nə qədər qorxduğunu göstərir”, – 2018-2020-ci illərdə Moskvada Fridrix Nauman Fondunun rəhbəri olmuş Yulius Fon Fraytaq-Lorinqhofen bildirib.

Qərb ekspertlərinin fikrincə, Navalnı ilk baxışdan qarşıdan gələn seçkilərdə Putin üçün heç bir təhlükə yaratmırdı. Bununla belə, nəşrin yazdığına görə, mümkün razılaşma haqqında məlumatlar ortaya çıxıb: Rusiya qatili Tierqartendən qaytaracaq, amerikalı jurnalist Evan Qerşkoviç və Aleksey Navalnı isə azad edəcək. Analitiklərin fikrincə, Kreml heç bir şəraitdə bunu etmək istəməyib.