Ərdoğan Rusiya və İranı sərt şəkildə tənqid edib

"Bu problem bütün dünyanı öz içinə alan bir girdaba çevriləcək"

Ölkə.Az xəbər verir ki, Türkiyə prezidenti Rəcəb Tayyib Ərdoğan Suriya prezidenti Bəşər Əsədə siyasi və hərbi dəstək verən Rusiya və İranı sərt şəkildə tənqid edib.

"Sumitomo Rubber Ako" təkər fabrikinin açılış mərasimində çıxış edən Ərdoğan bildirib ki, Suriyada dövlət terroruna dəstək verən bütün dünya ölkələri bu cinayət əməllərinin ortaqları hesab olunur.

"Suriya məsələsinə düzgün yanaşma olmasa, bu problem bütün dünyanı öz içinə alan bir girdaba çevriləcək. Bəzi ölkələr dövlət terroru həyata keçirən Bəşər Əsədə dəstək verməklə tarixin bağışlamayacağı ölkələrə çevrilirlər", - deyə Ərdoğan vurğulayıb.

Bir müddət öncə Ərdoğan bildirmişdi ki, Qərbdə İslam dininə kölgə salmaq üçün müxtəlif kampaniyalar aparılır, “İslam terroru” anlayışından istifadə edilir.

Rəşid Mustafazadə

Ölkə.Az