Kamil kimi hansı azərbaycanlı Rusiyada qandallana bilər? - AÇIQLAMA

Fevralın 21-də tanınmış fitnes məşqçisi Kamil Zeynallının Moskvada hava limanında saxlanılması və onun Ermənistan tərəfindən beynəlxalq axtarışa verilməsi barədə dedikləri ajiotaj yaratdı.

Onun adının "İnterpol"un beynəlxalq axtarış siyahısında olmaması müəyyən suallar doğurdu. Daha sonra isə K.Zeynallının vəkili Ələkbər Qarayev onun federal axtarışa verildiyini açıqladı.

Ölkə.Az xəbər verir ki, bütün bunların fonunda Ermənistan tərəfindən başqa ölkələrdə azərbaycanlıların axtarışa verilməsi istisna edilmir. Yəni sabah Rusiyaya və digər MDB ölkələrinə gedən hansısa azərbaycanlının Ermənistanın axtarışı əsasında saxlanılması ehtimalı var.

Bəs bu barədə Azərbaycan vətəndaşları haradan məlumat əldə edə bilərlər?

Mövzu ilə bağlı Ölkə.Az-a danışan təhlükəsizlik məsələləri üzrə ekspert İlham İsmayıl bildirib ki, beynəlxalq axtarışa verilənlərin siyahısı "İnterpol"un saytında yerləşdirilir:

"Şəxslərin beynəlxalq axtarışa verilməsi ilə bağlı məlumatlar ancaq "İnterpol"un saytında yerləşdirilə bilər. Ermənistanın hansı Azərbaycan vətəndaşını beynəlxalq səviyyədə "İnterpol" vasitəsilə axtarışa verməsi barədə "İnterpol Azərbaycan"dan məlumat almaq olar. Çünki beynəlxalq axtarışa veriləndə həmin şəxsi bütün dünya, eləcə də Azərbaycan da axtarmış olur". 

Fotoda İlham İsmayıl

Hüquqşünas Fərhad Mehdiyev isə Ölkə.Az-a açıqlamasında federal axtarış mövzusundan danışıb. O söyləyib ki, bu məsələ MDB dövlətlərinin hüquqi yardımlaşması ilə bağlı öz aralarında imzaladıqları müqavilələrlə tənzimlənir:

"Müstəqil Dövlətlər Birliyi (MDB) dövlətləri arasında hüquqi yardımlaşma haqqında müəyyən razılaşmalar var. Azərbaycanla Rusiya, Ermənistanla Rusiya və s. Belə başa düşürəm ki, K.Zeynallı da Ermənistanla Rusiya arasında bağlanmış müqavilə çərçivəsində axtarışa verilib. Əslində, Azərbaycanla Rusiya arasında da bu qəbildən müqavilə var. Məsələn, bizdə cinayət istintaqı olan şəxslər Rusiyada saxlanılıb bizə geri qaytarılır. Böyük ehtimalla, Rusiya ilə Ermənistan arasındakı müqaviləyə görə, K.Zeynallını axtarışa veriblər". 

F.Mehdiyev federal axtarışa verilən şəxslərin siyahısının açıq mənbədə olmadığını söyləyib:

"Mənə elə gəlir ki, məsələn, Ermənistanın Rusiya ərazisində kimləri axtarışa verməsi barədə məlumatlar açıq deyil. Azərbaycanla Rusiya arasında imzalanmış müqaviləyə görə də kimlərin Rusiya ərzisində axtarışda olması açıq məlumat deyil. Bu, bir az da istintaq sirrinə bağlı olan məsələdir. Həmin şəxslərin açıq şəkildə axtarılması, əməliyyat-axtarış işlərinə mənfi təsir göstərə bilər".

Hüquqşünas hesab edir ki, Rusiyanın ümumiyyətlə, K.Zeynallının axtarışını qeydiyyata alması səhv addım idi:

Fotoda Fərhad Mehdiyev

"Rusiya bilir ki, Azərbaycanla Ermənistan arasında müharibə şəraiti var. Ermənistan Rusiya ərazisində hansısa azərbaycanlını axtarışa qoyanda Rusiya bunu qeydiyyata almamalıdır.  Çünki o, adi cinayətkar deyil. Bir var siz hansısa oğrunu, qatili istəyəsiniz (burada mülki cinayətlərdən söhbət gedir), bir də var iki ölkə arasında müharibə şəraiti olsun və tərəflərdən biri hansısa şəxsin hərbi əməliyyatlarda iştirak etdiyini irəli sürərək axtarışa qoysun. Rusiya bunu qəbul etməməlidir. 
Onsuz da nəticədə K.Zeynallını da buraxdılar. Özləri də başa düşdülər ki, bunu etməməli idilər. Ümid edirəm ki, bundan sonra belə hallara yol verməyəcəklər".

Qeyd edək ki, fevralın 21-də K.Zeynallı Moskvadan qayıtmaq istəyərkən Domodedovo aeroportunda saxlanılıb. Səbəb isə Ermənistanın CM-in 4 maddəsi ilə cinayət işi başlatması və onu axtarışa verməsidir. Azərbaycan dövlətinin birbaşa müdaxiləsi ilə Zeynallı elə həmin gün günorta saatlarında azad edilib.

Billurə Yunus