Zığda gəlini ilə nəvəsini öldürən Gürcüstan vətəndaşının cəzası qüvvəsində qaldı
Bakı Apellyasiya Məhkəməsində Gürcüstan vətəndaşı Şərqiyyə Hüseynovanın (1974-сü il təv.) CM-nin 120.2.4-cü (xüsusi amansızlıqla qəsdən adam öldürmə), 120.2.7-ci (iki və ya daha çox şəxsi qəsdən öldürməyə cəhd) və 120.2.9-cu (aşkar sürətdə köməksiz vəziyyətdə qəsdən adam öldürmə) maddələri ilə təqsirləndirilməsinə dair cinayət işi üzrə məhkəmə prosesinin baxışı yekunlaşıb.
Ötən il dekabrın 10-da Suraxani rayonunun Zığ bağları ərazisindəki fərdi evdə kirayədə yaşayan Şərqiyyə Hüseynova gəlini Elnarə Nəcəfovanın (1994-cü il təv.) baş nahiyəsindən daş parçası ilə zərbələr endirərək onu qətlə yetirib, bundan sonra o digər otağa daxil olaraq yatmış vəziyyətdə olan 6 aylıq nəvəsi Emiliyanı boğaraq, uşağı qəsdən öldürüb. Daxil olan məlumat əsasında hadisə yeri Suraxanı RPİ 30-cu polis bölməsinin və rayon prokurorluğunun əməkdaşları tərəfindən müayinə olunmaqla qan nümunələri, daş parçası və digər əhəmiyyət kəsb edən maddi sübutlar götürülüb.
Təyin olunan məhkəmə-tibbi ekspertizasının rəyinə görə, Elnarə Nəcəfovanın ölümünə başın küt travması nəticəsində beyinə qansızma, onun qızının ölümünə isə, ağız və burun dəliklərinin əllə qapanmasından baş vermiş mexaniki asfiksiya səbəb olub.
İstintaqla müəyyən edilib ki, həmin gün saat 18 radələrində Şərqiyyə Hüseynova ürəyi sıxıldığını bəhanə edərək, yaşadığı evin qonaq otağında Elnarə Nəcəfovadan həyət darvazasını açıb, onu çölə buraxmasını tələb edib, amma sonuncu onun Bakıya təzə gəldiyini, yaşadığı əraziyə nabələd olmasını bildirib və psixi vəziyyətinə görə başına bir iş gələcəyindən qorxaraq, ona rədd cavabı verib.
Bu zəmində aralarında yaranmış mübahisə zamanı Şərqiyyə gəlinini və nəvəsini öldürmək qərarına gəlib. Cinayətdə istifadə edəcək aləti tapmaq məqsədi ilə həyətə çıxan Hüseynova ayaqyolunun yanında daş parçası görüb və onu götürərək evə qayıdıb. Qonaq otağında qarşısına çıxan Elnarədən bir daha onu buraxmasını tələb edib, amma gəlini əri Elvar gəlməyənədək, onu buraxa bilməyəcəyini deyib.
Onun cavabından hiddətlənən Şərqiyyə əlindəki daşla Elnarənin başına zərbə vurub, sonuncu yerə yıxılandan sonra, onun üzərinə oturub və ümumilikdə 13 ədəd xüsusi ağrılarla müşayiət olunan çoxsaylı xəsarətlər yetirməklə gəlinini öldürüb. Cinayət əməllərini davam etdirən qadın uşaq yatan otağa keçib və orada yatan nəvəsi Emiliyanı da boğaraq, qətlə yetirib. İfadənin yerində yoxlanılması zamanı Şərqiyyə Hüseynova özünü pis hiss etdiyini, divarların onu sıxdığını və danışmaq istəmədiyini əsas gətirərək ağlayıb və ifadə verməkdən imtina edib.
Məhkəmə prosesində ifadə verən Şərqiyyə Hüseynova bildirib ki, ailəsi ilə birgə Gürcüstanın Rustavi şəhərində yaşayıb, əri Polad heç yerdə işləməyib, özü isə mərkəzi bazarda alver edib. 2 il əvvəl oğlu Elvar Elnarə ilə ailə həyati qurub və onlar Bakıya köçərək, Zığ qəsəbəsində kirayə ev tutublar, 2014-cü ilin yayında qızları dünyaya gəlib, Elvar 8-ci kilometr qəsəbəsindəki avtomobil bazarında usta işləyib.
Gəlini ilə münasibəti yaxşı olub, yeganə problemi qəflətən sıxılma keçirməyi idi, özünü birdən piss hiss etməyə başladıqda, evdən çıxıb əetmək istəyib, lakin oğlu ilə gəlini onun evdən getməyinə imkan verməyiblər. Ayın 10-da o yuxudan oyananda gəlini və nəvəsi yatılı vəziyyətdə olublar, günortadan sonra qəflətən onda ürək sıxılması başlayıb, evdən çıxıb, Gürcüstana qayıtmaq istəyib.
O bu barədə Elnarəyə desə də, gəlini onu ərinin icazəsi olmadan buraxa bilməyəcəyini bildirib. Təxminən saat 19 radələrində Şərqiyyə yenidən Elnarədən qapını açmasını, ya da ki telefonla Elvarla əlaqə saxlamasını xahiş edib, sonuncu isə cavabında onun heç yerə getməyəcəyini deyib. Buna görə onu öldürmək qərarına gəlib və həyətdən götürdüyü daşla geri qayıdıb. Birinci zərbədən sonra Elnarə yerə yıxıldıqdan sonra, onun ölmədiyini görüb, sağ əli ilə boğazından tutub gəlini boğub. Bundan 5 dəqiqədən sonra yataqda olan Emiliyanı da boğaraq, həyətə çıxıb və yerdə uzanıb.
İşdən gələn oğlu onu həmin vəziyyətdə görüb, nə baş verdiyini soruşduqda, o“özümü pis hiss etdiyim üçün arvadınla uşağıvı öldürmüşəm” deyə cavab verib. Elvar bunu eşidən kimi içəri daxil olub və meyitləri görüb, qohumlarına və 102 xidmətinə zəng edib. Şərqiyyə Hüseynova ifadəsinin sonunda hər ikisini çox istədiyini və əməlindən peşman olmasını qeyd edib.
Cinayət işi üzrə təyin edilmiş stasionar məhkəmə-psixiatrik ekspertizasının rəyinə görə, Ş.Hüseynova “dəqiqləşdirilmiş qeyri üzvi psixoz” diaqnozu ilə Gürcüstanın Rustavi psixi sağlamlıq mərkəzində 2014-cü ilə kimi qeydiyyatda olub. Cinayət əməlini törətdiyi zaman yoxlanılan qadında şəxsiyyət dəyişikliyi qeyd olunub.
Bakı Ağır Cinayətlər Məhkəməsinin hökmü ilə Şərqiyyə Hüseynova 18 il müddətinə azadlıqdan məhrum etmə cəzasına məhkum olunub.
Hökmdən təqsirləndirilən şəxs şikayət verərək, cəzasının yüngülləşdirilməsini xahiş edib.
Bakı Apellyasiya Məhkəməsi işin hallarını araşdıraraq qərara gəlib ki, birinci instansiya məhkəməsinin hökmü dəyişdirilməsin. (oxu.az)
Ölkə.Az
