\"Rusiyanın Suriyaya girməkdə məqsədi öz ərazi bütövlüyünü qorumaqdır\"

"ABŞ İŞİD-i vaxtında Suriyada məhv etsəydi, heç Putinin Suriyada özünü göstərməyə ehtiyacı da qalmazdı"

Rusiyanın Suriyada keçirdiyi hərbi əməliyyatlar dünya gündəmini hələ də məşğul etməkdədir. Bəzi politoloqlar bunu Rusiyanın Bəşər Əsədə dəstəyi kimi qiymətləndirir. Bəziləri isə Rusiyanın Suriyaya girməkdə məqsədinin siyasi nüfuz qazanması olduğu deyir.

Rusiyanın Suriyaya girməkdə əsas məqsədi nə idi? Bəşər Əsəd, yoxsa nüfuz?

Bu sualı politoloq Mübariz Əhmədoğlu Ölkə.Az-da cavablandırıb:

"Rusiya Bəşər Əsədə kömək üçün Suriyaya girməyib. İŞİD Suriyada elə bir vəziyyətdə idi ki, artıq İŞİD-in Şimali Qafqaza, Azərbaycana, Mərkəzi Asiyaya gəlməklə bağlı bəyanatlarının sayı artmışdır. Bu dinamika göstərirdi ki, Putin İŞİD ilə vuruşmalıdır. Rusiya İŞİD-lə ya Şimali Qafqazda vuruşmalıdır, ya Azərbaycanda, ya da Mərkəzi Asiyada. Əgər Şimali Qafqazda İŞİD-in hücumu başlayırsa, bu o demək idi ki, Rusiya ərazi itkisinə məruz qala bilərdi. Şimali Qafqazda problemlər Rusiya üçün bu gün də çoxdur. Rusiyanın Suriyaya girməkdə məqsədi öz ərazi bütövlüyünü, daxili sabitliyini qorumaqdır. Rusiyanın Suriyaya girməkdə ikinci səbəbi güc nümayişidir. Rusiya Xəzərdən Suriyaya raket atdı, 1500 km məsafədə 5 metr xəta baş verdi. Bu çox yüksək göstəricidir.

Hal-hazırda sürətlə silahlanma yarışı gedir. Rusiya öz hərbisini gücləndiribsə, məcburdur ki NATO da öz hərbisini gücləndirsin. NATO-ya üzv olan hər dövlət məcburən öz büdcəsinin 2%-ni hərbi alyansa verməlidir. "Rusiya uduzur, Putin özü üçün çalışır" kimi xəbərlər ABŞ təbliğatıdır. Əgər ABŞ İŞİD-i vaxtında Suriyada məhv etsəydi, heç Putinin Suriyada özünü göstərməyə ehtiyacı da qalmazdı.

Putin bu dəqiqə öz imici və Rusiyanın nüfuzu üzərində işləyə bilirsə bu Qərbin apardığı səhv siyasətin nəticəsidir".

Qeyd edək ki, Rusiya 15 gündür Suriyada hava əməliyyatları keçirir.

Səxavət Məmməd
Ölkə.Az