“Xalqımız müasir dövrdə bir az zəifləyib, çünki...” - AÇIQLAMALAR

Rusiyalı məşhur opera müğənnisi Olqa Georgiyeva Azərbaycan teatrı haqqında gözəl fikirlər səsləndirib. O, Bakıdakı insanların teatrdan tərbiyə adığını, tamaşalara getdiyini söyləyib.

Azərbaycanda isə teatrla bağlı fikirlər birmənalı deyil. Teatrların öz aktuallığını qoruduğunu düşünənlərlə yanaşı, bu sənətə insanların daha maraq göstəməməsi fikrində olanlar da var. 

Ölkə.Az məsələ ilə bağlı mədəniyyət nümayəndələrinin fikirlərini öyrənib:

Xalq artisti, "Azdrama"nın aktyoru Əli Nur saytımıza açıqlamasında deyib ki, bütün incəsənət janrları müəyyən dövrdə qalxır və enir. O buna baxmayaraq kütləni arxasınca aparan teatrlara marağın olduğunu düşünür:

"Azərbaycan teatrı haqqında çox sözlər danışırlar. Bizim xalqımız, millətimiz müasir dövrdə bir az zəifləyib. Çünki təbəqəyə bölünüblər. Bir təbəqə var ki, onların pula ehtiyacı yoxdur. Bir təbəqə də var ki, orta təbəqədir. Digər bir təbəqə isə kasıb yaşayır. Onları teatra cəlb etmək olduqca çətindir. Amma bütün bunlara baxmayaraq bu gün Akademik Milli Dram Teatrının zalı həmişə dolu olur. 

Bir var, teatr kütlənin arxasınca getsin, onu güldürsün. Bir də var teatr kütləni öz arxasınca aparıb onları maarifləndirsin, ideoloji cəhətdən hazırlasın, vətənpərvər yetişdirsin, mənəvi, estetik zövq versin. "Azdrama" bax, bu teatrlardandır. Heç vaxt kütlənin arxasınca getmir.

Çox elmlər gəlib-gedəcək, amma teatr bəşəriyyətin ən son anına qədər yaşayacaq və xalqına, millətinə, dövlətinə xidmət edəcək", - deyə o əlavə edib.

Sənətşünaslıq elmləri üzrə fəlsəfə doktoru, Azərbaycan Teatr Xadimləri İttifaqının üzvü, Əməkdar İncəsənət Xadimi Aydın Talıbzadə isə Ölkə.Az-a açıqlamasında aktyorlarla həm eyni fikirdə olduğunu, həm də fərqli fikirləri bölüşdüyünü deyib:

"Şəxsən hansısa rusiyalı opera müğənnisinin belə düşünməsi bir Azərbaycan vətəndaşı, teatrşünası kimi məni sevindirir. Hesab edirəm ki, hazırda ölkəmizdə teatra marağın artırılması, teatr xadimlərinin qarşısında duran çox mühüm vəzifələrdən biridir. Deməzdim ki, bu gün Azərbaycanda teatra geniş spektrli maraq var. Əgər belə bir maraq olsaydı, özümü xoşbəxt hesab edərdim. 

Biz teatr xadinmləri olaraq çalışmalıyıq ki, doğrudan da Azərbaycan teatrı geniş miqyasda seyirçiyə maraqlı olsun və onlar özlərinə lazım olan mənəvi qidanı teatrdan ala bilsin. 

Bəli, xüsusilə pandemiyadan sonra teatr cameəsi bir-birinin tamaşalarına gedib baxırlar. Mən də həmkarlarımla teatra getdikdə görürəm ki, doğrudan da seyirçilər var, amma onların böyük əksəriyyəti teatr cameəsindən olanlardır. Qalanları isə təsadüfi adamlardır. Təsadüfi seyirçi isə hələ teatr tamaşaçısı demək deyil. Bu elə bir hədəf kütləsi olmalıdır ki, onların teatra gəlişi mütəmadi olsun".  

"Teatra marağı necə artırmaq olar" sualına isə professor belə cavab verib:

"Əgər birdən-birə bu suala cavab versəydim, onda bütün problemləri həll etmiş olardım. Ancaq Azərbaycan teatr cameəsi - içi mən və teatr rejissorları, rəhbərləri qarışıq - bu suala cavab axtarırıq. Çünki bu, dövrümüzün çox mühüm problemidir. Mən teatr direktorlarına, istər rejissorlara, istərsə də digər işçilərinə bəraət qazandırıram və görürəm ki, doğrudan da tamaşaçı gəlib baxır və gedir. Amma bu seyirçinin teatrdan bir gözləntisi olmalıdır. O, teatra sadəcə olaraq əyləncə xatirinə yox, mənəvi dünyasında olan problemlərə cavab axtarmaq üçün gəlməlidir. Güman edirəm ki, son dövrlərdə Azərbaycanın tear ictimaiyyətində olan gəlişmələr nəhayət ki, bizi bu problemin həllinə daha da yaxınlaşdıracaq".

Billurə Yunus