Səfil həyatdan Hollivuda: Brus Linin dostu və Qarabağı dəstəkləyən əfsanəvi Çak Norris

10 mart əfsanəvi Amerika kinoaktyoru, döyüş növləri ustası, Hollivud ulduzu Çak Norrisin doğum günüdür.

Ölkə.Az doğum günündə Çak Norrislə bağlı bir sıra maraqlı faktları təqdim edir.

Əsl adı Karlos Rey Norris olan Çak Norris 1940-cı ildə ABŞ-nin Oklahoma ştatının Rayan şəhərciyində doğulub. Norrisin atası avtomexanik olub və gələcək aktyorun ailəsi kasıbçılıqla yaşayıb. Onların daimi yaşayış yeri olmayıb, anası və iki balaca qardaşı ilə qalan Norris yarısəfil ömür sürüb. Valideynləri boşandıqdan sonra ailəyə yeni başçı gəlib. Məhz ögey atası Corc Nayt Çak Norrisin idmanı ehtirasla sevməsinin əsl səbəbkarıdır.

Orta məktəbi başa vurduqdan sonra Karlos Hərbi Hava Qüvvələrinin sıralarına yazılıb. O, 1959-cu ildə 3-cü dərəcəli pilot kimi Koreyaya göndərilib. Hərbi bazada onu "Çak" adlandırmağa başlayıblar.

Məhz orada Şərq mədəniyyəti və dini ilə tanış olan Norrisdə şərq əlbəyaxa döyüş növləri – karate, cüdo və taekvondoya maraq yaranıb.
3 il davam edən hərbi xidməti dövründə o, qara kəmər sahibi olub. Ordudan tərxis olunduqdan sonra Çak Los-Ancelesdə karate məktəbləri şəbəkəsi açıb.

1968-ci ildə o, orta çəkidə peşəkar karate üzrə dünya çempionu titulunu əldə edib. Çak bu titulu ardıcıl 7 il qoruyub və idmandan məğlubiyyətsiz gedib. Norris Qərb yarımkürəsində taekvondo sistemi üzrə 8-ci dərəcəli qara kəmərə layiq görülən ilk idmançı, eləcə də Ümumdünya Təkbətək Döyüş Liqasının banisi və prezidentidir.

İdman uğurlarının pik nöqtəsinin arxada qaldığını anlayan Çak Norris istədiyini kinematoqrafiyada tapıb. O, dünya kinosunda karyerasına dostu və sparrinq-tərəfdaşı, məşhur Brüs Li sayəsində başlayıb. Məhz Li Norrisi 1972-ci ildə "Əjdahanın qayıdışı" filmində çəkilməyə dəvət edib. Onların iştirak etdiyi döyüş səhnəsi bu gün də karate filmləri klassikasından sayılır.
Bu debütdən sonra o, yalnız "San-Fransiskoda qətliam" adlı Honkonq döyüş filminə təklif alıb. Norris yenə "pis oğlan" rolunu oynayıb və o qədər uğursuz alınıb ki, onu uzun müddət ekranlara buraxmayıblar.

Bu sənətin nə qədər çətin olduğunu anlayan Çak 34 yaşında aktyorluq sinfinə daxil olub.
1977-ci ildə kinoya qayıdan Norris "Dağıdıcı" döyüş filmində rol alıb və tezliklə "Cannon Pictures" şirkətinin filmlərinin ulduzuna çevrilib.
Brüs Linin vaxtsız ölümündən sonra "karate filmləri" janrında yaranan boşluğu məhz Çak Norris doldurub.

Kinoda 30 ildən çox fəaliyyəti dövründə Norris 55-dən artıq filmdə çəkilib. Onlardan "Oktaqon", "İtkin düşənlər", "Delta əməliyyatı", "Əjdahanın qayıdışı", "Göz-gözə, diş-dişə", və s. filmləri böyük populyarlıq qazanıb.

Daha ətraflı videoda:

Billurə Yunus