"Apple" "AirPods"ları eşitmə cihazına çevirir
"Apple" simsiz qulaqlıqları "AirPods"a eşitmə cihazı xüsusiyyətləri əlavə etməyə hazırlaşır.
Valyuta.az xəbər verir ki, bu barədə "Bloomberg" məlumat yayıb. ABŞ texnologiya şirkəti bu il buraxılacaq "iOS 18" əməliyyat sistemi yeniləməsi ilə "AirPods"a eşitmə cihazı rejimi gətirə bilər.
"AirPods" artıq istifadəçilərinə 2018-ci ildə iOS 12-nin bir hissəsi kimi təqdim olunmuş "Canlı Dinləmə" adlı funksiyanı təklif edir. Bu funksiya "iPhone" tərəfindən qəbul edilmiş səsi real vaxt rejimində "AirPod"lara ötürür, beləliklə istifadəçilər musiqi dinləyərkən xarici səsləri eşidə biləcəklər. Şirkət həmçinin 2021-ci ildə təqdim etdiyi "Nitq Təkmilləşdirmə" rejimi sayəsində istifadəçilərə qulaqlıqlardan istifadə edərkən söhbətləri daha yaxşı eşitmək imkanı yaradır.
"Apple"ın iyun ayında keçiriləcək "WWDC 2024" tədbirində "iOS 18" əməliyyat sistemini və "AirPods Pro"ya gələcək eşitmə cihazı rejimi xüsusiyyətini təqdim edəcəyi gözlənilir.
