Dünyanın ən qısa həkimi: Sirkdə təlxək olmağı təklif etmişdilər...

Dünyanın ən qısa boylu həkimi23 yaşlı Qaneş Baraiya uğur hekayəsi ilə insanların marağına səbəb olub.

Ölkə.Az xarici KİV-ə istinadla xəbər verir ki, 91 sm boyu, 18 kq çəkisi olan həkim Hindistanın Qucarat əyalətinin Talaja Thaluka rayonunda anadan olub.

O, normal olsa da, dörd yaşında ikən valideynləri başının bədənindən daha böyük olduğunu görərək həkimə aparıblar. Bu zaman azyaşlının sağalmaz xəstəlikdən əziyyət çəkdiyi üzə çıxıb.

Qaneşin anası oğlunun başının böyüməsinin qarşısını almaq üçün onun başına vannaya bənzər dəbilqə taxıb. Kiçik yaşlarında qısa boyu və böyük başına görə yaşıdları onu ələ salıblar.
Hətta görkəminə görə Qaneşin atasına oğlunu sirkdə təlxək kimi işə götürmək istədiklərini deyiblər. Övladnın qaçırılmasından qorxan ata onu hər gün özü məktəbə aparıb.
Hələ kiçik yaşlarından həkim olmaq istəyən Qaneş bütün diqqətini dərslərinə verib.

İmtahan nəticələrinin yaxşı olmasına baxmayaraq, Hindistan Tibb Şurası onun hündürlüyünə görə, fövqəladə hallarda vəzifələrini yerinə yetirə bilməyəcəyini iddia edərək, ərizəsini rədd edib.

Qaneş rədd cavabı ilə məyus oldsa da, arzusundan əl çəkmək niyyətində deyildi. Cəhdlərinin heç biri uğurlu alınmasa da, o, təslim olmaq istəmirdi.

2018-ci ildə Hindistanın Ali Məhkəməsinin nəhayət onun xeyrinə qərar çıxarmasından sonra Qaneş növbəti ildən təhsil almağa başlayıb.
Bu yaxınlarda təhsilini başa vuran həkim artıq xəstəxanada stajor kimi işə başlayıb.

Uşaqlıq arzusuna çatsa da, qısa boyuna görə xəstələrin ona müraciət etmək istəmədiyini deyən Qaneş hələ də ayrı-seçkiliklə mübarizə aparır.

"Xəstələr məni görəndə əvvəlcə bir az təəccüblənirlər, amma sonra qəbul edirlər və mən onların ilkin davranışlarını qəbul edirəm. Mənə səmimi və pozitiv yanaşırlar. Onlar da xoşbəxt olurlar" - həkim söyləyib.

Hələ adı Ginnesin Rekordlar Kitabına düşməsə də, Q.Baraiya "dünyanın ən qısa həkimi" adlanır və bununla fəxr edir.

Billurə Yunus