Sürücülər NİİM-in elektron tablolarından istifadə edirmi?

Şəhərdəki avtomobil sıxlığını göstərən elektron tabloların sürücülərə nə kimi köməyi var?

Ölkə.Az-ın çəkiliş qrupu bu dəfə də paytaxt sürücüləri arasında çox maraqlı bir videosorğu keçirib.

Sürücülərə "Paytaxtın küçə və prospektlərində quraşdırılmış, yollardakı hərəkət sıxlığını göstərən elektron tabloların sizə nə kimi köməyi var?" sualı ilə müraciət edib. Rəyi soruşulan sürücülərin demək olar ki, hamısı sualımıza tabloların işindən razı olduqlarını, bu tabloların sayəsində gedəcəkləri marşrutları əvvəlcədən müəyyən edərək, tıxaca düşmədən mənzil başına rahat çatmaqda onlara kömək etdiyini bildiriblər. Sürücülər Nəqliyyatın İntellektual İdarəetmə Mərkəzi (NİİM) tərəfindən quraşdırılmış bu elektron tabloların sayəsində tıxac olan yollardan canlarının qurtardığını qeyd ediblər. Bundan başqa həm də bu tablolar şəhərdəki nəqliyyat vasitələrinin alternativ yollardan istifadə etməklə işlək küçə və prospektlərdə də sıxlığı azaltmasına kömək edir. Nəqliyyat selinin yollar üzrə bərabər bölünməsinə, hərəkətin rahatlığına xidmət etdiyinə görə belə tabloların sayının artırılması daha məqsədəuyğun olardı.

Xatırladırıq ki, Nəqliyyatın İntellektual İdarəetmə Mərkəzi tərəfindən paytaxtın müxtəlif istiqamətlərində yerləşdirilmiş bu elektron tablolar günün 24 saatı ərzində şəhərimizin küçə prospektlərindəki avtomobil sıxlığını dəqiq əks etdirməklə sürücülərə mənzil başına çatmaq üçün rahat gedə biləcək marşrutları əvvəlcədən müəyyənləşdirməyə kömək edir. Tablodakı parlaq qırmızı rəng tıxac olan yolları, yaşıl rəng hərəkətin çox rahat olduğu küçə prospektləri, sarı işıq isə nəqliyyat vasitələrinin hərəkətinin qismən çətin olduğu marşrutları göstərir. Rənglərlə tabloda əks olunan yolların üzərində iri, hər kəsin oxuya biləcəyi hərflərlə şəhərinin küçə, prospekt və şosselərinin adları yazılır.

Çinarə Vahabzadə və Nurlan Gülməmmədov

Ölkə.Az