Real həyatda danışa bilmirlər, vəhşilik və ağır cinayətlər dalğası gəlir - TƏKLİF

"Bir hadisə baş verərkən onu dərhal birinin üzərinə yükləyirik və həmin şəxsi linçləyirik. Mövzu, səbəb-nəticə araşdırılmır, ortada bir günah keçisi olur, bütün qaz onun üzərində partlayır, iki-üç gündən sonra mövzu bitir və yenisi başlayır".

Ölkə.Az xəbər verir ki, bu sözləri jurnalist Samir Mirzə "Sözümüz sözdür" verilişinin qonağı olan zaman "Fəsadlar fərddən cəmiyyətə doğru" mövzusunda fikirlərini bildirərkən deyib.

"Heç kim axtarmır ki, bu insan niyə bu hadisəni törətdi. Biz demirik ki, kiməsə qəsd olundusa, öldürməyə bir səbəbi vardı. Xeyr! Niyə onda o həvəs yarandı ki, öldürsün?! Niyə bu proses baş verdi?! Təsirlər araşdırılmalıdır. Çünki heç kim deyə bilməz ki, mənim başıma bu hadisə gəlməyəcək, mən belə cinayət törətməyəcəyəm. Ən yaxşı insanlar belə, ağlasığmaz hərəkətlərə yol verə bilirlər. Bunun üzərində çalışmaq lazımdır ki, insanları bu vəziyyətə salan nədir. Biz ötəri fikir bildirə bilərik - sosial şəbəkə, pis vərdişlərdir və s. deyəcəyik. Mütəxəssislər araşdırmalıdır, ömrünü elmə xərcləyən professorlar bir yerə toplanıb məsələnin həllini tapmalıdırlar".

Sosial mediadan danışan jurnalist onu da bildirib ki, sözügedən platformalar bir insanı bir neçə şəxsiyyətə bölə bilir.

"Tanışım vardı, onunla vatsap üzərindən danışırdıq, işləyirdik və çox səmimi söhbət edirdik. Amma real həyatda üz-üzə gələndə salamıma yad insan kimi reaksiya verdi. Deməli, bir insan platformalara öyrəşibsə, yalnız orada qalır, oradan çıxarkən tamam başqa insan görürük. Olduqca təhlükəlidir. Şəxsiyyətlərə bölünmüş bir insanın hər hansı hadisəyə necə reaksiya verəcəyi qeyri-müəyyəndir. Onun içərisində vəhşi də ola bilər, mülayim insan da. İnsanlar real həyatda özünüifadə qabiliyyətini itirdiyi üçün mənasız mübahisələr çıxır ortaya".

Daha ətraflı videoda: